Raakh Ban-nay Ka Hosla Tau Karain

Hmaaray jazbaat hi asal Quqnus hain; jab aik khatam hota hai tau us ki raakh se nya jazba janam leta hai.
(Goethe)

Raakh Se Dobaara Janam

Quqnus aik aisa afsaanvi parinda hai jis ka zikr mukhtalif rwaayaat mein mukhtalif naamon se milta hai. Yeh parinda apni khoobsurti aur mas-hoor kun awaz mein apni misaal aap hai. Sadiyon zinda rehne waala yeh parinda apni zindagi ke ikhtitaam par lakriyan ikatthi karta hai. Un par baith kar Deepak Raag gaata hai tau lakriyon ko aag pakar leti hai. Apne pro’n se bharkaayi hui isi aag mein yeh parinda jal kar raakh ho jaata hai. Phir barish hoti hai aur is ki raakh se aik anda banta hai jis se is ka doabara janam hota hai aur yeh phir se parwaaz shuru kar deta hai.

Yeh alaamti kahaani zahir karti hai;
raakh hamesha ikhtitaam ki alaamat nahi hoti, aik nayi shuruaat ka aaghaaz bhi hai. Magar is ke liye apne hi pro’n se aag bharka kar is ke andar jalnay ka hosla chahiye.

Dobara Jeene Ke Liye Marna Zaroori Hai

Don Nix likhta hai;
”Har koi hansna chaahta hai
Lekin rona koi bhi nahi chaahta
Phir kehta hoon; har koi hansna chaahta hai lekin rona koi bhi nahi chaahta
Har koi jannat mein jaana chaahta hai lekin marna koi bhi nahi chaahta”

Hum aksar haalaat ki dehakti hui aag mein koodnay se dartay hain aur umeed kartay hain ke aazmaish ke in krray maraahil se guzray baghair hi sab kuch theek ho jaye ga.

Isi bila-jwaaz rawayyie par shaayar ne khoob tanz kiya hai;

Phool hi haath lagain, haath mein kaantay na chubhain
Aap bhi aaye hain kya khoob tamanna le kar
(Shayar: Namaloom)

Shikast is ke ilaawa aur kya hai ke hum aagay barhna chhor dein.
Zawal is ke siwa aur kuch bhi ke hmaaray andar urooj ki tamanna baqi na rahay.
Raai-gani yahi hai ke hum gir kar giray rehnay ko hi apna muqaddar maan lein aur phir se uthnay ki koshish tark kar dein.

”Quqnus ko dobaara janam lenay ke liye pehlay khud jalna parta hai.”
(Janet Fitch)
Dana log kehtay hain; khaalis sona aag se kabhi nahi darta. Kyun keh isi aag mein jal kar hi woh kundan banta hai.

Bahadur wahi hain jo apnay hissay ki aag mein khud hi be-khatar koodnay ka hosla rakhtay hain. Aur pukaar uthtay hain;
Kundan huway hain aag bhi apni lagaa kay hum
Hum par kisi sunaar ki marzi nahi chali
(Shayar: Atif Javed Atif)

Musawari Ka Quqnus: John James Audubon

John James Audubon mash-hoor Ameriki musawar tha. Usay parindon ki musawari ke hwaalay se shohrat hasil thi. Us ki shahkaar kitab ‘The Birds of America’ parindon ke hwaalay se aik behtareen kitab tasawwur ki jaati hai.

Ibtidayi zindagi tag-o-do mein guzri. Kaarobar mein nakaami ki wajah se qarz mein dooba raha. Isi wajah se jail bhi gya. Magar yeh bahadur shakhs Quqnus ki tarah haalaat ki aag mein jal kar bhi apni umeed aur maqsad ko har baar nya janam deta raha.

America ke duur draaz janglon aur waadiyon mein dushwaar guzar safar kiye aur parindon ki tsaaveer bnaana shuru kar dein. Woh zinda parindon ya haal hi mein shikar kiye gaye parindon ki musawari karna pasand karta tha. Woh fitrat ke tahaffuz ka alam-bardaar bhi tha.

Us ki zindagi mein aik aisa takleef-deh marhala aaya, jab usay maloom hua ke us ki dau sau qeemti tsaaveer, jinhein us ne kai baras tak janglon ki khaak chhaan kar takhleeq kiya tha, chooho’n ne tbaah kar di hain. Yeh sadma bohat gehra tha. Woh kai hafton tak bimaar raha.

Albert Camus ka qaul hai;
‘Shadeed mayusi ke aalam mein hi, may nay apnay andar aik na-qaabil-e-shikast umeed daryaft ki.’

Yahi woh lamha bhi tha jab Audubon ne khud ko ehsas dilaaya ke dwaam paanaye ke liye us ke andar ke musawar ko dobaara zinda karna zaroori ho gya hai.
Us ne phir se apni bandooq uthayi, pencilein lein aur aik baar phir janglon ki gehraiyon mein utar gaya.
Maqsad ki pukhtagi humein dilair bna deti hai.

Parindon Ka Falsafi: Richard Bach

Ameriki musannif Richard Bach ne college mein bas saal-e-awwal tak taleem mukammal ki aur Air Force Jet Fighter Pilot mein tarbiyat ke liye shamooliyat ikhtiyar ki. Tarbiyat ki takmeel ke athaara saal baad hi us ne istifa de diya aur shoba-e-hwaa-bazi ke magazine mein btor mudeer khidmat sar-anjaam dena shuru kar dein magar kuch arsay baad tangi-e-haalaat se diwaaliya ho gya. Jo tadbeer ki, nakam rahi.

‘Jo larta hai woh haar sakta hai magar jo nahi larta woh pehlay hi haar chuka hota hai.’ (Brecht)

Us ne apna novel ‘Jonathan Livingston Seagull’ likhna shuru kiya tau us ka anjaam na likh paaya. Aatth saal tak maswada yunhi namammal prra raha aur bil-aakhir us ne isay mukammal karnay ka faisla kar liya.

18 publishers ne maswada radd kar diya magar jab yeh kitab shaaya hui to mukhtalif zbaanon mein is kitab ki sattar lakh kaapiyan farokht huyein aur mehaz aik kitab ki badolat aalami shohrat ka hamil aik moatabar adeeb ban gaya.