Aap kitni shiddat say giray thay?

Kabhi koshish ki? Kabhi nakaam huay? Koi baat nahi. Dobaara koshish karo. Dobaara nakaam ho. Is baar behtar nakaam ho. (Samuel Beckett)

​Bar-ha nakaami ke bawajood aagay barhtay rehna, har baar gir kar bhi khud ko sambhaalna, saabit qadam reh kar apni manzil ki taraf nazar rakhna, aur phir har baar khud ko yeh yaqeen dilaana ke nakaami ka tasalsul khatarnaak nahi, himmat ka toot jaana khatarnaak hai; insaan ke maqsad ko bil-aakhir us ke qadmon mein le aata hai.

​”Asal baat yeh nahi ke aap kitni shiddat se giray, balkay yeh hai ke aap kitni twaa-naayi se waapas ubhray.” (Zig Ziglar)



​Colonel Sanders Kentucky Fried Chicken (KFC) ka baani hai, jo maujooda duniya ke sab se brray Food Chains mein se ek hai. Elementary school mein paanchvain saal us ki taleem adhoori reh gyi magar baad mein us ne faaslaati taleem ke zariye Law ki degree haasil kar li.

​Jab Sanders ki umar chhay saal thi, us ka waalid faut ho gya aur usay family ke liye khaana khud bnaana parta kyun ke us ki maa kaam karti thi. Naujawaani mein usay firefighter, steamboat (bhaap ke eendhan se chalnay wali kashti) driver, insurance salesman aur Cuba ki army mein aam fauji ki khidmaat samait kai kaam karna prray. 40 bars ki umar mein, riyaasat Kentucky ke sheher Corbin mein raah-geero’n ke ta’am ke liye chicken service ka aaghaaz kiya. Us ki shohrat barhnay lagi aur woh motel (shah-raah par bna hua hotel, jahaa’n theharnay aur parking ka intezaam bhi ho) aur restaurant mein b’tor chef kaam karnay laga.

​Magar sab theek nahi chal raha tha. Apni umar ki saatth ki dehaayi mein bhi Sanders muflisi ka shikaar tha. Pressure cooker mein makhsoos triqay se chicken fry karnay ka license haasil karnay ke liye usay America mein tveel aur takleef-dah safar ki museebat se bhi guzarna prra jis dauraan woh paisay bachaanay ki khaatir car mein hi sota raha.

Us ka mud’daa yeh tha ke har fried chicken ki farokht ke badlay restaurant ke maalik usay paanch Cents (ek dollar ka souwaa’n hissa) dain gay.
​Dau saal tak woh ek hzaar aath baar nakaam hua aur phir aakhir-kar woh apnay maqsad mein kaamyaab ho hi gya aur yun KFC ki bunyaad prri.