Aakhai’n Kholiye; khauf ko rukhsat kijiye.

Aik raat, jab Isabel soi hui thi.
Ek darawna khaab, usay dabochnay ke liye, dheeray dheeray, us ki aur barhnay laga,
Yeh dinosaur se zyada khaufnak tha aur shark se bhi zyada khaufnak tha, yeh khaab
Tareeki mein wahshat bhra raqs kartay octopus se bhi zyada khaufnak
”Haaoo” ”Haaoo” bhyaanak lehjay mein, daant peestay huay, khaab ne kaha,
”Main aaj tujhay andar tak hila doo’n ga.”
Isabel, bilkul na ghabrai.
Woh cheekhi aur na darr ke bhaagi.
Isabel ke paas us se kahi’n zyaada behtar tadbeer thi
Us ne sirf aankh khol di, aur khaab ko be-waquuf bana diya.
(Ogden Nash)



​Jab hum khauf se faraar chahtay hain to yeh mazeed barhta hai. Isay khatm karnay ka wahid rasta yahi hai ke khauf ko ‘tasleem’ kiya jaaye. Tab hamein pta chalta hai ke khauf mahaz waham tha aur hmaaray sha’oor ki baidaari se woh waham rukhsaat ho gaya.

​”Bahaduri khauf ki adam maujoodgi ka naam nahi balkay is par fatah paanay ka naam hai.”
(Nelson Mandela)

​Khauf-naak haalaat se kahin zyada un ke baaray mein hmaaray apnay khayaalaat hamein pareshan kartay hain. Kharji waqiyaat par hmaara control na bhi ho, par apnay zehen par to hamein ikhtiyaar haasil hai. Agar hum apna yeh ikhtiyaar aqal mandi se istemal kartay huay ‘sirf apni aankh khol kar’ apna radd-e-amal zaahir karein tau bairooni preshaniyon par bhi hum qaabu paa saktay hain.

Khamosh sha’oor cheekhtay huay shor se zyada taaqatwar hota hai. Khauf ki sab se brri shikast ‘aankh kholnay’ se ho jaati hai. Yahi woh khud-shanaasi hai jo tabdeeli ki tarf pehla qadam hai.


​”Jab tak aap apnay la-sha’oor ko sha’oor mein nahi laatay, yeh aap ki zindagi ko control karta rahay ga aur aap isay apni taqdeer kehtay rahein gay.”
(Carl Jung)