Bhoot apni shaklai’n badalta rehta hai.

​Ek shakhs ki biwi ne martay waqt us se kaha,
“Mujhe aap se be-panaah mohabbat hai. Mein aap ko tanha nahi chhorna chaahti aur yeh bhi nahi chaahti, aap mujhe dhoka dein. Wada karein, agar mein mar gayi tau aap kisi aur kay nahi hon gay aur agar aisa hua tau mein aasaib ban kar aap ki zindagi ajeeran kar doo’n gi.”

​Biwi ki maut ke baad kai maah tak woh doosri khawateen se ehtiraz karta raha. Phir ek roz woh kisi khatoon se mila aur dono mohabbat kar baithay. Jis roz mangni hui us raat, us ki saabqa biwi ka bhoot us kay saamnay aa kharra hua. Shohar ki be-wafaai par woh sakht ghussay mein thi. Us ke baad har raat woh apnay shohar ko taana dainay aa jaati. Us kay aur mangaitar kay maa-bain din bhar jo m’aamlaat hotay us ki saabqa biwi ka bhoot usay sab bta deta, hatta kay un kay darmyaan honay wali baato’n ka ek ek lafz dohra deta. Shohar is qadar pareshan ho jaata keh raat bhar so na paata.

​Mayoosi ke aalam mein, woh mashwra lainay kay liye gaao’n kay qareeb mqeem Zen Master ke paas hazir hua.

“Yeh tau brra chaalaak bhoot hai.”
Is be-chaaray ki kahaani sun kar Master ne kaha.

​”Haan, aisa hi hai.”
Us shakhs ne jwaab diya.
“Saara din jo kuch mein kehta hoon ya karta hoon, usay sab yaad hota hai.”

​Master ne muskuraatay huay kaha,
“Yeh bhoot waqai tareef ke laayeq hai, par ab mein btaata hoon, tumhein aagay kya karna hai.”

​Us raat jab bhoot us ke paas aaya, Master ki di gyi hidaayat ke mutaabiq woh shakhs bhoot se kehnay laga.

“Tum bohat aqal-mand bhoot ho. Tumhein ilm hai, mein tum se kuch nahi chhupa sakta, agar tum mairay ek swaal ka jwaab day dau tau mein mangni tor doon ga aur sari zindagi akailay hi basar kar doon ga.”

​”Poocho, jo poochna hai.”
Bhoot ne kaha.

​Shohar ne farsh par prray ek brray thailay se mutthi bhar lobiya kay daanay nikaaltay huay swaal kiya:

“Btao, mairay haath mein lobiya kay daano ki sahi tadaad kya hai?”

​Bhoot ek dam se ghaayab ho gya aur phir kabhi waapas nahi aaya.



​Bhoot, us ki apni hi zaat ka “waham” hai jo us shakhs ki maloomat ki had, khauf ki shiddat aur jazbaat ki gehraai se janam laita hai. Bhoot bas wahi kuch jaanta hai, jitni jaan-kari us shakhs ki hai aur yeh insan ke apne zameer ya maazi ka aisa pachtaawa bhi hai jis par usay ehsas-e-sharmindagi hai.

​”Bhoot dar-asl hmaaray dabay huay jazbaat ki waapsi hai.” (Sigmund Freud)

​Yeh hmaaray andar kay khauf ka berooni izhaar aur daakhli tabeer hai. Jung kay mutaabiq insaan ka sab say brra khauf us ka “Shadow Self” hota hai, yani apni zaat ka woh pehlu jisay woh qubool nahi kar paata aur woh us kay saamnay berooni shakal mein zaahir ho jaata hai.

Insan jab apnay ilm, tajurbay aur apnay andar kay khauf ko samajhnay lagta hai tau bhoot ki shaklain bhi badalti jati hain.


​Hum ashiya ko waisay nahi daikhtay jaisay woh hain, bal-keh waisay dekhtay hain jaisay hum hain. (Kant)