Agar may na kroo’n tau phir is say mohabbat kon kray ga?
Ek bachi ko us ki daadi ne ek khoobsurat sunehri baalo’n wali gurriya ka tohfa diya.
Woh bachi itni khoobsurat gurriya dekh kar khushi se uchhal parri aur daadi ka shukriya ada kiya aur saara din usi gurriya se khelti rahi. Lekin din ke aakhir mein us ne sunehri baalo’n waali gurriya ek taraf rakh di aur apni puraani gurriya ko dhoond nikala.
Us ne phatti purani gurriya ko apni baanho’n mein liya. Is gurriya ke baal jharr chukay thay, naak tooti hui thi, ek aankh ghaaib thi aur ek baazu aur ek taang bhi nahi thi.
Daadi muskara kar boli’n,
“Lagta hai, tumhe yahi gurriya sab se zyaada pasand hai.”
Bachi ne masoomiyat se jwaab diya,
“Daadi, mujhay aap ki di hui khoobsurat gurriya bohot pasand aayi. Lekin main is purani gurriya se sab se zyaada mohabbat karti hoon, kyun ke agar main is se mohabbat na karoo’n, tau phir koi bhi nahi karega.”
Mohabbat taqaddus ka rukh tab ikhtiyar karti hai jab hum yak-tarfa mohabbat ka ‘bojh’ uthaanay ko tayyaar ho jaatay hain. Aisi surat mein mohabbat faqat jazba nahi rehti balki ek taaqat ban jaati hai jo kisi la-waaris ko waaris bna deti hai. Aur aisi mohabbat karnay wala shaks, us Maseeha ka roop ikhtiyar kar leta hai jis ki zarurat har beemaar mu’ashray ko hoti hai.
Kisi be-sahaara, kisi mardood, kisi be-wuq’at se mohabbat hi Kamaal-e-Bandagi hai. Yahi woh mohabbat hai jo us khaali jagah ko pur karnay ki koshish karti hai jisay duniya ne chhor diya hai.
Mohabbat koi soda baazi nahi jo mohhib ya mehboob ka mansab dekh kar ki jaaye. Balkay…
Maidaan-e-wfa darbaar nahi, yaa’n naam o nasab ki pooch kahaa’n
Aashiq tau kisi ka naam nahi, kuch ishq kisi ki zaat nahi
(Faiz Ahmad Faiz)
Zameen par giray huay woh log, jin ke kapray puraanay, jootay ghissay huay, chehray thkay huay, aur aankhon ke gird gehri siyaah halqon mein jhuriyaalay khaabo’n ke bad-numa daagh hain, un se mohabbat karna har dil ke bas ki baat nahi.
Aisay aftadaagaan-e-khaak, jin se insaan honay ka mansab bhi chheen liya gya ho, un ki taraf khud chal ke jaana, un ke kamzor haath ko thaam kar, be-gharz mohabbat se un ke khoye huay mansab par faiz karnay ki himmat karna hi zameen par insaaniyat ka bharam qaayam rakhna hai.
Duniya ki nazar hamesha chamakdar chehro’n aur kamyaab daastaano par hoti hai. Hum aisi cheezon ki taraf hi raaghib hotay hain jo bi-zahir khoobsurat hon ya hmaari zaat ke liye faida mand hon. Aisi mohabbat faqat samaaji contract aur lain-dain par mabni hoti hai. Jab hum khud ko is tijaarati nizaam-e-mohabbat se azaad kartay hain to hum apni rooh ko azaad karte hain.
Jis mohabbat ki tameer is jazbay se uthaai gayi ho,
“Agar main is se mohabbat na karoo’n, to phir koi bhi nahi karega.”
…tau mohabbat apnay khaalis tareen roop mein dhal jaati hai.
Yeh ek aisi nekki hai jo kisi ajar ki mohtaaj nahi kyun ke is ka ajar amal ki pakeezgi mein hi pinhaa’n hai.
Yahi woh jazba hai jisay doosron mein taqseem kar ke insan ki apni zaat ke andar darveshi aur be-niyaazi ka charaagh jal uthta hai.
Mohabbat woh shai hai
‘Agar doosron mein taqseem bhi kar dain
Tau, aap ke paas pehle se kahin zyaada barh jaaye gi
Mohabbat jadoo ka ek aisa sikka hai
Jisay hathaili par rakh kar mutthi band kar lain
Tau yeh ghaaib ho jaaye ga.
Yeh sikka doosron ko bakhsh dain, kharch kar dain;
Tau aap mo’jiza daikhai’n gay
Ke, aap ke saamnay, farsh par kai sikkay
Gardish kar rahay hain.
(Bcho’n ka Geet)
🌹 Sharing is Caring 🌹