Mashaqqat ki zillat jinho nay uthaayi

Rumi farmaatay hain: jo cheez tumhain takleef deti hai, wohi tumhain nikhaar deti hai, taariki hi tumhaaray liye charaag banti hai.
Ghurbat, rakaawatai’n aur mushkilaat kamyaab logo’n kay rasty mein zaroor aati hain magar woh apni quwwat-e-iraadi se unhai’n shikast de kar duniya mein apna m’qaam paida kartay hain. Insaan kay andar saabit qadmi, mehnat, waqt ki qadr aur apnay maqsad kay husool kay liye aahni azm maujood ho tau rasty ki har rakaawat rait ki deewar sabit hoti hai.

Nafsiyaat kay mutaabiq, agar insaan hosla buland rakhay tau mushkil haalaat mein apnay bachaao ki koshish kartay kartay woh apnay dukh se koi maqsad paida kar leta hai. Woh survival mode se meaning mode mein chala jaata hai. Isi liye tau Rumi da’wa kartay hain, “zakhm woh jagah hai jahan roshni daakhil hoti hai.”

Hma-jehat salaahiyato’n kay maalik Leonardo Da Vinci ne bhi sadiyo’n qabl yeh raaz pa liya tha ke “daana khaak mein mil kar gul-o-gulzaar hota hai.”
Is genius ka qoul hai;
“Ay Khuda, tu sabhi qeemti cheezei’n hum se bhaari mushaqqat kay daam lay kar hi hmain ataa karta hai. Mehnat hi woh beej hai jisse hum apni khaahish ki saari cheezai’n ugaa saktay hain. Jo shakhs mehnat se ji churaata hai, behtar yahi hai ke woh khud ko muflisi ka haq-daar samjhay.”

Da Vinci ne apni la-zwaal painting “The Last Supper” takhleeq karnay mein aisa doob kar kaam kiya ke woh aksar auqaat khaanay peenay kay hosh se bhi bai-gaana rehta.

Johannes Kepler jadeed falakiyaat ke baani hai. Us ne saabit kiya, sayyaaray gol nahi balkay baizavi madaar mein sooraj kay gird ghoomtay hain. Us ki tehqeeq ne Newton ke kashish-e-saql ki daryaaft ki buniyaad bani. Us ki ibtidaayi zindagi bai-shumaar pareshaaniyo’n ka shikaar thi. Rozgaar kay liye usay ilm-e-nujoom kay zariye faal nikaalnay ka kaam karna prra. Us ne har us mushaqqat bharay kaam ko qabool kiya jisay us ki guzr-basr ho sakti thi.

Carl Linnaeus ko “Father of Modern Taxonomy” kaha jaata hai. Us ne jaanwaro’n aur paudo’n kay naam dainay aur unhai’n darjo’n mein taqseem karnay ka aik saayensi nizaam mutaarif kraaya. Lafz “Homo Sapiens” bhi usi ne diya. Aisay azeem scientist ki zindagi ne bhi usay baar-haa aazmaya. Woh tangdasti kay bhaari bojh tlay dbaa raha. Doran-e-talib-ilmi us kay jooto’n ki haalat aisi thi ke woh kaaghaz morr morr kar apnay phattay jooto’n mein rakh kar unhai’n pehn-nay ke qaabil bnaata. Ussay aksar dosto’n se khaana maangna parrta tha.

Humphry Davy ne electrochemical amal ke zariye keemiyai murakkabaat ko torr kar kayi naye anaasar daryaaft kiye, jin mein sodium, potassium, calcium aur magnesium shaamil hain. Kaano’n kay mazdooro’n ke liye “Davy Safety Lamp” ijaad ki. Michael Faraday ko usi ne tarbiyat di. Us ki sachi lagan ne bhi har tarah ki mushkil par usay saabit qadam rakha. Mehdood wasaail ke bawajood, us ne himmat na haari aur roz-marrah ki cheezo’n ko apnay saayensi tajarbo’n kay liye istemaal kiya.

George Stephenson aatth behan bhatiyo’n mein se aik tha. Ghurbat aisi thi ke sabhi aik hi kamray mein rehtay thay. Woh parrosi ki gaayai’n charaata tha. Satrah bars ki umr mein us ki zimmedaari aik engine ki daikh-bhaal thi, jis mein us ka baap eendhan daalnay ka kaam karta tha. Us ne engine ko hi apna ustaad bna liya. Doosray kaarigar chuttiyo’n kay dauraan mauj-masti kartay thay magar George apni machine ke purzay alag karta, saaf karta, b’ghor mushaahida karta aur mukhtalif tajarbay karta. Yeh us ki azm-o-himmat ka sila hai ke us ne duniya ka pehla bhaap par chalnay waala rail engine bnaaya. Usay jadeed railway ka baani samjha jata hai.


Bartaanvi artist James Sharples apnay waqt ka mash’hoor musawwir tha. Us ki mashhoor painting “The Forge” ne aik aam mazdoor ki zindagi ki jhalak ko funn ki aala tareen satah par paish kiya. Baad mein baishtar musawwiro’n ne us painting ki naqlain bhi bnaayee’n. Is ghareeb lohaar ne bhi apnay khaab zaroorato’n kay samandar mein tair kar mukammal kiye. Woh aksar teen bjay utth jaata taa ke un kitaabo’n ki naql kar sakay jinhai’n woh khareed nahi sakta tha. Sakht mehnat kar kay bhi aath mile paidal chal kar painting ka samaan khareednay jaana parrta. Woh lohaar ki dukaan mein sab se bhaari kaam maangta tha kyun ke bhaari loha aag mein zyaada waqt leta hai, aur is douran usay kitaab parhnay ke liye kuch qeemti waqt azaafi mil jata. Woh apnay har faarigh lamhay ko is tarah apnay mutala’a aur funn ki behtari kay liye istemaal karta jaisay shaayad usay kabhi dobaara yeh lamha mayassar na aaye ga. Isi aik atal maqsad aur folaadi iraaday ne usay kamyaabi ki bulandi tak pohnchaaya.

Michelangelo ne musawwari, mujasama saazi aur tamiraat mein aisay shah-kaar takhleeq kiye ke us ka naam duniya ke azeem aur ghair mamooli afraad mein shumaar hota hai. Jab woh aik studio mein nangay paao’n kaam kar raha tha, aik boorhay painter ne us kay funn se mutaasir ho kar kaha,
“Yeh larka aik din mujhay bohat peechay chhor jaye ga.”
Is azeem funn-kaaar ne bhi tangdasti ki aag mein khud ko kundan kiya. Woh apnay azm se ghurbat kay andhairo’n mein bhi raasta bnaata raha. Jab woh Bologna mein aik kaansi kay mujasmay par kaam kar raha tha tau ghurbat ka yeh aalam tha ke woh apnay chhotay bhai ko apnay paas bulaanay ki ista’taa’at na rakhta tha. Us kay paas sirf aik hi bistar tha jis par woh aur us kay teen mu’aawin artists sotay thay. Us ne apni yaadgaar painting “The Judgment” par baarah bars lagaaye thay.
Us ne aik baar apni funn-karaana mahaarat ka raaz kuch is tarah afsha kiya,
“Agar logon ko khabar ho jaye ke husool-e-kmaal-e-funn ki khaatir mujhay kis qadar sakht mehnat karna parri tau unhein mairay kmaal par kisi taur hairat nahi rahay gi.”

Apnay aakhri ayaam mein, jab us ki nazar intehaai kamzor ho gayi thi aur woh behad naheef ho chuka tha, woh aksar apnay khaadimo’n se kehta ke woh usay barray barray halls, galleries aur ibaadat gaaho’n mein le jayen jahaa’n jahaa’n us ne josh aur lagan se shah-paaray takhleeq kiye thay.

Woh mujasamo’n aur naqsh-o-nigaar par apnay haath phairta, ungliyo’n se apnay funn ki un juz’iyaat ko mehsoos karta jo ab us ki aankhai’n nahi daikh sakti thee’n, aur phir khushi se pukaarta,
“May ab bhi seekh raha hoon.”