Tau janaab, zra bataaiye tau sahi, aap kaun hai’n?
Mash’hoor comedian Mitch Hedberg ne aik baar saame‘een ko aik mazaahia waaqea sunaaya ke jab kisi radio station ke aik program mein woh interview dainay gya tau DJ ne us se pehla swaal yeh kiya,
“Tau janaab, zra bataaiye tau sahi, aap kaun hai’n?”
Mitch Hedberg kehta hai, woh chand lamhe isi soch mein ghira raha,
“Kya yeh shakhs waqai mein itna gehra hai, ya phir may hi ghalat radio station interview dainay pohanch gya hoon.”
Hikmat ki ibtida isi swaal se shuru hoti hai ke ‘aap kaun hain?’ Yeh aisa swaal hai jo insaan ki shnaakht, wujood, shu‘oor, dard, khahishaat aur yaad-daasht sab ko aik saath baidaar kar deta hai. Yeh swaal insaan ke la-shu‘oor ki dehleez par dastak daita hai taa ke woh apni haqeeqi zaat se mulaaqat kar lay. Yeh swaal insaan ke saamnay aik aaina rakh daita hai jis mein woh pehli dfa khud ko dekh pata hai. Is swaal ka jwaab khariji tawaqquaat ko mustrid kar kay apnay sachay nafs ko apnaanay mein posheeda hai. Yahi woh swaal hai, jis ki khoj mein nikal kar insaan khudi ke us martabay tak pohanch jaata hai, jahaa’n ‘Khuda banday se khud poochay bata teri rza kya hai.’
“Aap kaun hain?” itna gehra falsafiyana swaal hai, aksar is se guraiz kartay kartay, hum zindagi se hi parda kar jaatay hain. Kaainaat mein apnau wujood ko manwaanay ki khaatir is swaal ka jwaab talaash karnay kay liye apnay andar utaarnay ka hosla chaahiye, par apni zaat ki tareeki mein utarnay se pehlay hmaara chehra utar chuka hota hai, aur is safar par jaanay se pehlay hi jaan jaati nazar aati hai. Apnay andar nigaah daaliye, khauf aap ko koodnay nahi day ga, waswasay behla-phusla kar safar ke aaghaaz se pehlay hi waapas le aayen gay.
Jung ki raa’ey mein, jo kuch aap ke saath hua hai aap woh nahi hain, aap woh hain jo aap ban-na chaahtay hain.
Jab doosro’n ne apnay wujood ka asbaat “aap kaun hain?” ka kathin safar tay kar ke hi paaya tau phir aap kyun nahi?
(Zahir hai; ‘aap’ se muraad ‘hum’ hain. Baqol Alice Walker, “Woh ‘hum’ hi hain, jin ka humein intezar hai.”)
Aur agar rakht-e-safar kal baandhna hai, tau phir aaj kyun nahi?
Steve Maraboli bhi yahi paighaam deta hai;
Aaj, beshumaar log umeed ki aik nai kiran kay saath baidaar hon gay, tau phir aap kyun nahi?
Aaj, beshumaar log, apnay ird gird bikhri khoobsoorti kay nazaaray ke liye apni aankh kholai’n gay, tau phir aap kyun nahi?
Aaj, beshumaar log, guzashta kal kay manhoos saaye ko peechay chhornay ka ehad kar ke lamha-e-maujood ki azeem taaqat ko apni dastaras mein laayen gay, tau phir aap kyun nahi?
Aaj, beshumaar log, shukook-o-shubhaat aur ehsaas-e-adam-e-tahaffuz ka bojh, apni khud-mukhtaari kay bharosay apnay mazboot kandho’n ko saunp dain gay, tau phir aap kyun nahi?
Aaj, beshumaar log, apni khud-saakhta hudood ko phlaang kar apnay andar ki zor-aawar taaqat mein utar jaayen gay, to phir aap kyun nahi?
Aaj, beshumaar log, apni aulaad kay liye role model ban kar zindagi guzaarne ka faisla karain gay, tau phir aap kyun nahi?
Aaj, beshumaar log, apni khushiyo’n par khud se lagaai hui pa-bandiyo’n aur zanjeero’n se azaad ho kar jeenay ka faisla karain gay, tau phir aap kyun nahi?
Aaj, beshumaar log, saada zindagi ki khair-o-barkat se khud ko aagah karain gay, tau phir aap kyun nahi?
Aaj, beshumaar log, ghambeer akhlaaqi masaail kay faisla-kun marhalay se guzar kar apnay zaati mufaad ki bajaaye haqq ke intikhaab ko tarjeeh dai’n gay, tau phir aap kyun nahi?
Aaj, beshumaar log, khud ko qaabil-e-reham bnaanay ki aadat se chhutkaara pa kar zindagi ki mushkilaat se nibard-aazma honay waalay umeed kay raahi ban jaayen gay, tau phir aap kyun nahi?
Aaj, beshumaar log, apnay halaat badalnay kay liye har zaroori qadam uthaayen gay, tau phir aap kyun nahi?
Aaj, beshumaar log, behtar maa, baap, beta, beti, taalib-e-ilm, ustaad, kaarkun, maalik, bhai aur behan waghera ban-nay ka azm-e-musamman karain gay, tau phir aap kyun nahi?
Aaj, aik naye din ka aaghaaz hai.
Beshumar log, aaj kay din ko apnay liye mubaarak bnaaye’n gay.
Beshumaar log, aaj se zindah-dili ka muzaahira shuru kar dai’n gay.
Tau, phir aap kyun nahi?
Masla yeh nahi ke koi aur aap ki raah mein haail hai, asl muamma yeh hai, aap apnay liye khud rukaawat ban banay huay hain۔
Khud ko aisi Sulemani topi pehna rakhi hai ke apni hi nazron se khud ko ojhal kiye baithay hain۔
Aik nannhay bachay nay
Aik taaray ki taraf dekha
Aur rona shuru kar diya
Tau
Taara bol prraa
“Nannhay bachay!
Kyun ro rahay ho?”
Aur bachay ne kaha
“Tum is qadar duur ho
Mairay liye mumkin hi nahi
Ke tumhai’n chhoo sakoo’n.”
Aur phir
Taaray ne jwaab diya
“Nannhay bachay!
Agar may pehlay hi say na hota
Tumhaaray dil kay andar
Tau, tumhaaray liye mumkin hi na hota
Ke tum mujhay dekh sako.”
(John Magrila)
Tau, aaiye, ro lijiye, agar ufaq kay us paar sitaara tau hum ne dekh liya magar khud ko nahi dekh paaye. Apno ki doori ka gham na-qabil-e-bardaasht hua tau un ko manaa liya magar apnay aap se duuri ka gham manaana bhool gaye. Apnay dil mein poori kaainaat samo li par khud kay liye jagaah na bna paaye. Chalai’n, aik aansu na sahi, aik qahqaha tau banta hai na, khud se duuri par. Woh qahqaha, jo falak-shigaaf chaahay na ho lekin apni zaat mein shigaaf daal kar khud ko washgaaf kar day to bhi kaafi hai. Doosro’n se maat khaana, waqai mein bohat brra dukh hai magar khud se maat kha kar khud se bhaagtay rehna bhi tau aik daa’imi shikast hai۔
Tau phir, apnay qareeb aaiye, khud ko chhoonay ki koshish kijiye aur zamaanay bhar ko apnay sehr mein le lijiye۔
Sharm kis baat ki? Dastak dijiye۔
Jhijhak kaahay ki? Darwaza kholiye aur khud ka isteqbaal kijiye۔
Aur tafakkur ki ibtida kijiye۔
Blaise Pascal kay khayaal mein, “Insaan ki saari mushkilaat dar-asl us ki apni hi naa-ahli ki bina par sar uthaati rehti hain ke woh kabhi kisi kamray mein thorri dair kay liye bhi bilkul tanha khaamoshi se apnay saath waqt nahi guzaarta.”
Baqol Aflatoon, “Ghaur-o-fikr ka amal apni zaat se hum-kalaami ka sharaf hai.” Apni hi kaainaat mein apne rubaru ho kar aik taweel mukaalmay ka aaghaaz kijiye۔
Franz Kafka kehta hai, “Aap ko apnay kamray se baahar jaanay ki koi zaroorat nahi. Apni maiz kay qareeb baithay rahiye aur sun-nay ki koshish kijiye. chaahay suniye bhi nahi, bas intezaar kijiye. Intezaar bhi na kijiye. Khamosh akailay baithay rahiye. Duniya apna har parda hta kar khushi se khud ko aap kay huzoor paish kar day gi. Is ke paas koi doosra rasta nahi, yeh deewana-waar aap kay qadmo’n tlay dhay parray gi…”
Dr. David Schwartz ki tehqeeq kay mutabiq, Hasptaalo’n mein assi fi-sad bistar aisay mareezo’n se bharay parray hain jinhno’n ne apnay marz ko apnay dimaagh par swaar kar rakha hai۔ Is ka yeh matlab har-giz nahi ke woh log jismaani marz mein mubtala nahi hain, balkay yeh ke un kay marz ki ibtida, jism ki bjaaye, un kay dimaagh mein hui thi۔
Is liye, dimaagh se is ‘wahm’ ko nikaliye ke aap wahm hain۔
Duniya ko qadmo’n mein dhair karnay se pehlay, khud ko apnay qadmo’n se uthaaiye۔
Khud se shikast kha kay khud ko fatah kijiye۔
Mzeed takheer mat kijiye, kyun ke:
“Aaj, aap ki baqiya zindagi ka pehla din hai۔”
Lehaaza:
Aap jahaa’n kharray hain, wahi’n se shuruaat kar dain aur maazi ki fikr har-giz na karain
Ab dobaara ibtida karnay mein, maazi aap ki koi madad nahi karay ga
Agar aap maazi ko bohat duur peechay chhor aaye hain
Tau phir qissa khatm, aap us se nipat chukay, aagay barh chukay۔
Ab (zindagi ki) kitaab kay aglay baab ka aaghaaz hai
Ab, aik nya daur hai, jis ki mansooba bandi aap kar chukay hain
Guzray huay dino ko hasrat se dekhna chhor dain
Aap jahaa’n kharray hain, wahi’n se shuruaat kar dai’n۔
Aap ki guzashta nakaamiyon ki taraf duniya ka dhyaan bilkul nahi rahay ga۔
Agar aap az-sar-e-nau aaghaaz karnay ki himmat kar kay fatah o kaamrani haasil karain
Tau aanay waala waqt aap ka hai, aur waqt ka dhaara musalsal behtaa chla ja raha hai
Aur abhi bohat sa kaam, mehnat aur mushakkat baqi hai
Madfoon ghamo’n aur “murda mayoosiyon” ko (ab) faramosh kar dain
Woh saamnay aik nai aazmaish aap ka rasta daikh rahi hai
Mustaqbil usi ka hai jo himmat aur hoslay ka muzaahira karta hai
(Is liye) aap jahaa’n kharray hain, wahi’n se shuruaat kar dain
( Berton Braley )
🌹 Sharing is Caring 🌹