Adhuuray-pun kay Dukh

Aik dafa ka zikr hai; aik pastah qad Aadmi tha, jis ka qad taqreeban teen foot tha. Us ki shadeed khwahish thi keh us ka qad lamba ho.
Achanak usay khayal aaya keh is maqsad kay liye apnay jaanwar dosto’n se mashwrah karna chahiye.

Ghorray ne mashwarah diya,
“Bohat si jai aur makai khaya karo. Rozaana taiz daurna mamool banao. Dekhna, tumhaara qad bohat jald barh jaye ga.”
Us Aadmi ne mashwaray par amal kiya, rozaana yehi khoraak khaata raha. Us ka qad tau na barha, lekin usay ma’day mei’n takleef mehsoos honay lagi.

Phir woh nazdiki charaa’gah mei’n apnay motay dost Bail kay paas gya.
Bail ne kaha,
“Rozaana bohat zyaada ghaas khaao aur jo bhi tumhaaray paas aaye us par zor-daar hamlah karo. Is se tumhaara qad zaroor barrhay ga. Mera qad bhi aisay hi barha hai.”
Us ne waisa hi kiya, magar ghaas khaanay se bhi us ki tabiyat boojhal rahi aur woh jis shakhs par bhi zor aazmai ki koshish karta, woh usay mazaaq samajh kar nazar andaaz kar deta.

Udaasi aur naumeedi ka maara woh Aadmi apnay puraanay rafeeq bhooray Ullu (maghrib mei’n ullu danish ki alaamat samjha jaata hai) se mila.
Ullu ne khaamoshi se us ki baat suni aur bola,
“Tum apna qad kyu’n barhaana chaahtay ho?”
“Ta keh jab meri kisi se laraai ho, mujhay maar na prray,”
us ne jwaab diya.
Ullu ne phir swaal kiya,
“Kya abhi tak tumhaari kisi se laraai hui hai?”
“Nahi … magar kisay khabar, kab kis se laraai ho jaye?”
Us ne pareshani mei’n kaha.
“Hunh, mai’ray khyaal mei’n, qad barhaanay kay liye ye kisi tarah bhi koi maqool wajah nahi.”
Ullu ne baat hi khatam kar di.
Aadmi ne taizi se rad-e-amal diya,
“Ruko, ruko… may is liye lamba hona chahta hoo’n keh duur tak daikh sakoo’n.”
Ullu ne bezaari se poocha,
“Duur tak ka nazaara karnay kay liye kya tum kabhi kisi darakht par charrhay ho?”
“Ji, haan,”
Aadmi ne ghutti si awaaz mei’n kaha aur saath hi koi maqool wajah bhi zehan mei’n laanay laga jis se woh Ullu ko qaail kar sakay keh us ki khaahish qaabil-e-jwaaz hai.
Lekin bhooray Ullu ne us ki uljhan mehsoos kartay huay, dheeray se usay naseehat ki:
“Mai’ray dost, tumhaaray jism ki growth aur chhotay size mei’n koi masla nahi. Jis cheez ki asal mei’n zarurat hai, woh tumhaaray dimaagh ki growth hai.



Jism hmaara woh makaan hai, jis mei’n hmai’n martay dam tak rehna hai. Jahaa’n hamesha rehna ho, us ki qadr aur daikh-bhaal bohat zaruri hai. Magar ‘body shaming’ kay khauf se hum aksar ye baat bhool jatay hai’n keh hum is makaan ko mukammal taur par apni marzi kay mutaabiq badal nahi’n saktay.

Danish-mandi yehi hai, hum apnay jism ki qabooliyat kisi sharmindagi ya judgement kay baghair karnay ki koshish karai’n, aur is haqeeqat ko kabhi fraamosh na karai’n;