Laugo’n per nahi, un kay saath hansai’n.

Kisi ki khoobi ka tazkira mehfil mei’n aur us kay aib ka zikr usi kay saamnay kijiye.
Koi aap ko maseeha samajh kar apna masla lay kar aata hai tau usay suniye, tokiye nahi.
Sun kar us kay maslay ko chhota sabit karnay kay liye jahaa’n bhar ki misaalai’n na dijiye.
Us ki dil-joyi ki khaatir pehlay tasleem kar lijiye keh us ka masla waqai mei’n brraa hai.
Us kay baad koi mashwara dijiye.
Aise logon ko faqat saam’een mayassar ho’n tau un kay bohat se maslay yunhi hal ho jaatay hai’n.

Neil deGrasse Tyson ne hairat zaahir ki thi keh,
“Yeh ajeeb baat hai; nakaam afraad ki hosla-afzaai ki bjaaye hmaara baishtar waqt kaamyaab afraad ko mubarak-baad dainay mei’n sarf ho jaata hai.”

Peter J. Daniels chauthi jamaat mei’n tha jab us ki teacher Mrs. Phillips har roz in alfaaz mei’n us ki sarzansh karti thi:
“Peter! Tum achhay insaan nahi ho aur na kisi kaam kay ho. Tum zindagi mei’n kabhi kuch kar nahi pao gay.”
Peter ke zehan mei’n yeh baat baith gayi keh woh nikamma aur kund-zehan hai.
Woh un-parrh hi raha, aur phir jab woh chhabbis bars ka tha, us ka aik dost raat bhar usay Napoleon Hill ki aik kitaab parh kar sunaata raha.
Us waqaye ne us ki zindagi badal daali — aur phir woh waqt bhi aaya keh us ki pehchaan b’a’tor aik musannif har taraf phail gayi.
Us ne muta‘addid kitaabai’n likhee’n aur un mei’n se aik ka unwaan tha:
“Mrs. Phillips, aap ghalat thee’n.”

Teacher ki musalsal hosla-shikni ne Peter kay muqaddar mei’n aawaargi rakh di,
aur ek dost ki hosla-afza rafaaqat ne us ki zindagi badal daali.

Samaaj mei’n mardum-bizaari ki bohat brri wajah hadd-darja nuqta-cheeni aur bai-jaa tanqeed hai.
Logo’n ko jeenay dijiye.
Hmaaray samaaj mei’n ghutan barrhti chali jaa rahi hai kyu’n keh hum aik doosray kay zaati ma‘amlaat mei’n bila-wajah apni naak ghusairtay hai’n.

Hiss-e-mazaah insaan ki shakhsiyat ko nikhaarti hai, lekin apni hiss-e-mazaah se faqat doosro’n ka mazaaq uraanay ka kaam na lijiye.
Hiss-e-mazaah mei’n lataafat aur shaguftagi paida kijiye. Logon par nahi, un kay saath hansiye.
Pal bhar ki hansi kay liye kisi aur ki zindagi ajeeran mat kijiye.
Logon mei’n aisay rahiye keh jab aap un ke saath ho’n to unhai’n yahi ehsaas rahay keh woh bohat khoobsurat hai’n.
Koi brraa kaam mumkin nahi to kam-az-kam apni hasti ko aisa aaeena bnaa dijiye jis mei’n logo’n ko un ki khoobsurti nazar aaye.