Diya jalaaye rakhna hai.

Kehtay hai’n, aik diya doosra diya jalaanay se apni roshni nahi khota balkay apnay ird-gird saaray manzar ko roshan-tar kar deta hai. Mushkil waqt mei’n apnay saathi ki madad se insaan khud bhi mazeed buland ho jata hai aur yehi woh bahaaduri ka amal hai jo kisi ki bhi zindagi badal sakta hai.
Kamyabi ki chand azeem tareekhi kahaniyan kisi azeez ya mukhlis dost kay paida kardah aitmaad ya harf-e-tasalli ki marhoon-e-minnat hai’n.

Agar wfaa-shiaar biwi, Sofia kay paas aitmaad ka jadooi chiraagh na hota to duniya-e-adab par Nathaniel Hawthorne jaisa dev-qaamat shakhs kaisay manzar-e-aam par aata.
Us roz, shikasta-dil Nathaniel jab ghar lotaa tau biwi se kehnay laga; woh barbaad ho gaya hai kyu’n-kay usay naukri se nikaal diya gya hai. Magar woh hairaan ho gya jab biwi ne gham ki is khabar par bhi khushi ka naara lagaaya.
Woh faat’haana andaaz mei’n boli,
“Ab, tum aaraam se apni kitaab likho.”
“Kya kahsa, kitaab likhoo’n? Aur likhnay mei’n jitna arsa lagay ga, hum guzaara kaisay karai’n gay?”
Shohar ne qadray bay-yaqeeni ki kefiyat mei’n swaal kiya.
Uski hairat ki inteha na rahi jab biwi ne draaz khol kar aik khateer raqsm nikali.
“Aray, itni raqam kahaa’n se aayi?”
us ne sawal kiya.
Biwi ne wazaahat di, “Tum se pehli mulaاqat mei’n hi may jaan gayi thi keh tum aik genius ho, aur mujhay yaqeen tha; tum kabhi koi shaah-kaar takhleeq karo gay. Har haftay, ghar kay akhrajaat kay liye tum jo raqam detay, may thori thori bachaa leti thi. Ab hmaaray paas itni raqam hai kej saal bhar kay liye aasani se guzaara ho jaayega.”

Yeh us azeem biwi ke yaqeen aur aitmaad ka karishma tha ke Amreeki Adab ki tareekh mei’n The Scarlet Letter jaisay azeem novel ka izasfa hua.