Doosri cheezo’n se yaksaa’n mohabbat karo

Har insaani rishtay mei’n mohabbat aur tahammul o bardaasht bohat zaroori hai’n. Mohabbat mei’n tahammul aur bardaasht shaamil ho’n tau is se brri taaqat duniya mei’n koi aur nahi. Yeh tabhi mumkin hai, jab hum ’idealism‘ se nikal kar aik doosray ko sunai’n, aur sirf suni sunaai ko un-suni kar dai’n. Aik doosray par aitmaad karna seekhai’n.

Aik nau-b’yaahta jorray ki shadeed tamannaa thi, un kay darmiyaan mohabbat kabhi kam na ho balkay waqt kay saath barhti rahay. Unho’n ne aik daana buzurg se swaal kiya,
’’Hum apni mohabbat ko dair’paa bnaanay kay liye kya karai’n?’’
Buzurg ne jwasb diya,
’’Doosri cheezo’n se, tum dono yaksaa’n mohabbat karo.’’

Izdwaaji talluqaat mai’n draar tab paida hoti hai jab mia’n biwi apni apni pasand aur na-pasand mai’n ek doosray se ikhtilaaf kartay huway baaz-auqaat is qadr duur nikal jaatay hai’n keh un ka rishta naazuk morr pe pohanch jaata hai. Halaa’n-keh, ikhtilaaf-e-raaye rakhna koi ghalat baat nahi. Zinda log hi aapas mei’n ikhtilaaf-e-raaye rakhtay hai’n, murdon ki apni koi raaye nahi hoti. Magar ikhtilafaat jab bardaasht ki sarhadai’n phaalang kar zaati mukhalifato’n mei’n dhal jaatay hai’n tau unki zad mei’n sab se pehlay mohabbat hi aati hai. Isi liye kaha gaya,
’’Mohabbat karnay waalay aik doosray ki samt nahi balkay aik hi samt dekhte hai’n.


Albert Schweitzer aust darjay se bhi kam-tar zehniyat ka ek taalib-e-ilm tha. Magar din raat mehnat ki badolat us ne mutanawwo mazameen mei’n mahaarat haasil kar li aur un par kitabai’n bhi tahreer kee’n. Tees bars ki umer mei’n us ne dramaai andaaz mei’n shsuba-e-tibb mei’n bhi dakhla le liya kyun keh us ki nazar se aik mazmoon guzra tha jis mei’n Congo ke baashindo’n ki khasta haali aur mohlik jismaani amraaz kay haatho’n tarap tarap kar be-yaar o madadgaar maut ka safar tay karnay ki dil-khraash ruu-daad byaan ki gayi thi. Us ne faisla kar liya, woh un logo’n ki madad kay liye Africa jaaye ga.
Dosto’n ne usay roka aur samjhaaya;
’’Agar unki madad hi karni hai to funds jmaa kar kay un kay liye bhejo taa keh woh apna mayaar-e-zindagi behtar bna sakai’n.’’
Magar us ne koi daleel nahi maani aur Africa ja kar un logo’n ki khidmat hi ko zindagi ka nasb-ul-ain maan liya. Us ne jis larki ko shaadi ki tajweez paish ki, uska naam Helene Bresslau tha. Us ne Helene ko shaadi ka paighaam bhi qadray manfrid andaaz mei’n paish kiya,
’’Main Africa mei’n apni khidmaat dainay kay liye medical ki taleem haasil kar raha hoo’n. Kya tum mairay saath boorha hona chaho gi aur mairay saath reh kar ghareeb logo’n ki madad kartay huway apni poori zindagi jungle mei’n guzaarna pasand karogi?’’
Helene ka rad-e-amal bhi ghair-mamooli tha,
’’Albert! Mujhay tum se mohabbat hai. Is liye, ab may Nurse banoo’n gi aur tum mairay b’ghair nahi ja sako gay.’’

Us kay baad dono ne apni apni zindagi Africa kay liye waqf kar di.

Woh ek doosray ki taraf nahi balkay ’aik hi taraf‘ daikhnay kay mojzay se aashna thay.