Aik nazm kahi’n se bhi shuru ho sakti hai

Aik nazm kahi’n se bhi shuru ho sakti hai
Jooto’n ki jorri se
Ya qabr se jo baarisho’n mai’n baith gayi
Ya us phool se jo qabr ki paainti par khila
Har aik ko kahi’n na kahi’n panah mil gayi
Cheentiyo’n ko jaaye nmaaz ke neeche
Aur larrkiyo’n ko meri awaaz mai’n
Murda bail ki khoprri mai’n gilahri ne ghar bnaa liya hai
Nazm ka bhi aik ghar ho ga
Kisi jla-watan ka dil ya intezar karti hui aankhe’n
Aik pahiyya hai jo bnaane waalay se adhoora reh gaya hai
Use aik nazm mukammal kar sakti hai
Aik goonjta hua aasman nazm ke liye kaafi nahi
Lekin ye ek naashtay-daan mai’n aasani se smaa sakti hai
Phool, aansu aur ghantiya’n is mai’n proyi ja sakti hai’n
Isay andhairay mai’n gaaya ja sakta hai
Tehwaaro’n ki dhoop mai’n sukhaaya ja sakta hai
Tum use dekh sakti ho
Khaali bartano’n, khaali qameezo’n aur khaali gahwaaro’n mai’n
Tum isay sun sakti ho
Haath gaariyo’n aur jnaazo’n ke saath chaltay huway
Tum isay choom sakti ho
Bandar-gaaho’n ki bheer mai’n
Tum isay goondh sakti ho
Pathar ki naand mai’n
Tum isay ugaa sakti ho
Podinay ki kiaariyo’n mai’n

Aik nazm
Kisi bhi raat se tareek nahi ki ja sakti
Kisi talwaar se kaati nahi ja sakti
Kisi deewar mein qaid nahi ki ja sakti

Aik nazm
Kahi’n bhi saath chhorr sakti hai
Baadal ki tarah
Hwaa ki tarah
Raastay ki tarah
Baap kay haath ki tarah…