Gyaa waqt phir haath aataa nehi

Waqt kay bahaao main woh log gard bunn kar hamesha kay liye khaak ho jaatay hain jo us ki ehmiat se waqif nehi hotay.
Waqt ki chaal aisi ajeeb hai, yeh guzartay huway bhi maujood hee rehta hai aur hum guzar jaatay hain.
Hum aksar ghair eham kaamon main ulajh kar waqt ki mutthi se rait ki tarah behtay huway raayegan hotay rehtay hain.
Woh log azeem hain jo arfa o adna mqaasad main farq kar kay lamha-e-maujood ki qeemat kau sehi maanon main baish qeemat bnatay hain.

Hikayat hay;
Buddha (Gautam Budh) tbleegh ki gahrz se musalsal safar main tha. Aik roz, woh aik intehaayi chorray aur gehray darya par pahunchaa tau usay abuur krnay kay liye kashti ki zrurat paish aai. Wahaan qreeb hee aik aalim rehta tha. Jab us tak khabar pohnchi keh Buddha darya abuur krnay kay liye kashti ka muntazir hai, woh foran Buddha kay paas aaya aur kehnay lagaa,
’’kya aap wohi mash’hoor-e-aalam Buddha hain?‘‘
Buddha nay aajzi se jwaab diya,
’’G haan, Muhtaram! btaayie, May aap ki kya khidmat kar skta hoon?”
“Aray jnaab! aap waqai main wohi azeem hasti hon gay lekin zra mulahiza kijiye, may kis mqaam par faaiz hoon.‘‘
Aur phir us aalim nay apni kramaat dikhana shuru kar dee’n.
“Aap kau maloom hai? May bina kashti kay, paani par chal kar darya abuur kar skta hoon?”
Aur darya kay kinaaray waapas pahunch kar us nay fakhar se kahaa,
’’kya aap aisa kar sktay hain?”

“kashti kay sahaaray kay bghair darya abuur krnay ki mahaarat haasil krnay kay liye aap nay kitna arsa ryaazat ki hay?
Buddha nay swaal kiya.
’’Taqriban, pachees bars.‘‘ Us aalim nay jwaab diya.

’’Aray waah! yeh sab intehaayi hairaan kun hai! Lekin, may tau sirf pandrah sikkon kay ivaz ba-asani darya abuur kar skta hoon.‘‘
Buddha nay jwaab diya.