Yehi raha hai azal se Qalandro’n ka tareeq

Aik roz, ek chailay ne darvesh sift guru ke saamnay brray adab se jhuk kar arz ki;
woh us ka shaagird ban’nay ki sa‘adat haasil karna chahta hai.
Guru ne us ke kaan mein ek roohani mantar phoonka aur sakhti se taakeed ki ke yeh amaanat kisi aur par zaahir na kray.

Chailay ne tajassus bhray andaaz mein poocha,
‘Aur agar may ne yeh raaz faash kar diya tau kya ho ga?’”

Guru ne qadray sakhti se jwaab diya,
“Tum jisay yeh mantar sikha do gay woh jahaalat ki bandishon aur aziyat ki zanjeeron se azaad ho jaaye ga magar tum phir meri shaagirdi ke qaabil nahi raho gay aur tum par azaab bhi naazil ho ga.”

Guru se mantar suntay hi woh chaila bazaar ki taraf bhaaga, apnay gird ek hujoom ko ikattha kiya aur baghair kisi khauf ke sab ke saamnay woh mantar buland awaaz mein dohraya.

Doosray shagirdon ne guru ko yeh saara maajra sunaaya aur mutaalba kiya ke us na-farmaan shaagird ko is gustaakhi par dars-gah se baahar nikaala jaaye.

Guru ne ek duur-russ muskuraahat se jwaab diya,
“May tau usay pehlay hi yahaan se nikaal chuka hoon. Usay ab yaahan rehnay ki koi zaroorat nahi kyun ke jo kuch bhi mairay paas sikhaanay ko tha woh us ne seekh liya hai. Ab usay sikhaanay ke liye mairay paas mazeed kuch nahi hai. Us ke amal ne saabit kar diya ke woh khud ek guru ban chuka hai.”



Neki ki jurrat insaan ke andar khabeeda insaaniyat ki bedaari hai. Jab doosron ki bhlaai maqsood ho tau insaan apni zaat ke mufaad ki nafi kar ke muaashray mein haqeeqi tabdeeli ka nuqta-e-aaghaaz ban jata hai.

Hazaar andeshon mein bhi zabaan ko dil ki rafeeq bna kar doosron ki bhlaai ke liye aagay barhna hi haqeeqi qalandaron ka tareeq hai.

Aur yeh jurrat o bahaaduri ka aisa sabaq hai, jisay yaad kar ke phir kisi maktab ki zaroorat bhla kahaa’n rehti hai.