Yeh sab hum par munhasir hai.

Leo Buscaglia ka qaul hai: Hum aksar lams, muskuraahat, aik mehrban lafz, sun’nay waalay kaan, aik dyaanat-daar tareef, ya dekh-bhaal ke chhotay se amal ki taaqat ko kam tar samajhtay hain, halaa’n ke in sab mein kisi ki bhi zindagi ko yak-sar badal daalnay ki salaahiyat mojood hoti hai.

Kainaat mein har chhoti cheez kisi bari tabdeeli ka sabab ban sakti hai. Taghayyur ki ibtida aik chhotay lekin qabil-e-amal iqdaam se hoti hai; hazaro’n meelo’n ki musaafat aik qadam se hi shuru hoti hai. Tmaam chhotay aamal tareeki aur mayoosi jaisi kefiyato’n par fatah paanay ki bzaahir nanhi si magar umeed ki taaqatwar kiranai’n hain jo apnay andar batray batray mo’jizay ru-numaa karnay ka hunar rakhti hain. Howard Zinn ki nazar mein, chhotay chhotay aamaal jab laakho’n logo’n kay zariye zarb hotay hain to duniya ko badal saktay hain.

Jis tarah khauf muta’addi hota hai, bahaadri bhi na sirf muta’addi hoti hai balkay yeh is khauf ke tasalsul mein daraarr daalti hai. Baarish ka pehla qatra ban’nay ki himmat baaqi qatron mein bhi tehreek paida karti hai aur is tarah ijtimaai jurrat ka qaabil-e-taqleed maahol ban jaata hai.
+
Ab yeh hum par munhasir hai ke hum apnay andar ki mayoosi se poora maahol tareeki mein badaltay hain ya phir The Last Leaf ke fankaar boorhay Behrman ki maanind khud tareeki ki nazar ho kar bhi shadeed toofani raat mein doosro’n ko mayoosiyo’n ke andhero’n se nikaalnay kay liye umeed ke aakhri pattay ko deewar par paint kar jaatay hain. Yeh sab hum par munhasir hai.