Ye mohabbat nehi, rooho’n ka daayemi talluq hai.
Maa ki azmat ek aisa aafaaqi tasawwur hai jis ki misaal duniya ki har tehzeeb mein milti hai. Is bay-laus mohabbat mein badlay ki tawaqqo ya kisi qisam ki koi shart shaamil nahi hoti.
Agar kisi mohabbat mein doosra pehle aata hai, tau woh maa ki hi mohabbat hai. Woh apni anaa ko markaziyyat se hta deti hai aur us ke har faislay mein markazi haisiyat ‘may’ ki bjaaye ‘meri aulaad’ ban jaati hai. Woh aulaad ke liye apna waqt, neend, khwahishon aur khushiyon ki qurbani de kar bhi khush rehti hai.
Darasal ghar banta hi tab hai jab ghar mein maa maujood ho.
Aik larkay ne apnay school mein honay waali asaatiza aur walidain ki pehli conference mein apni maa ko shirkat ki daawat di. Us ki udaasi ki inteha na rahi jab maa ne wahaan jaanay ki haami bhar li. Us ki maa us ki class ke saathiyon aur teacher ke saamne pehli martaba aanay waali thi. Woh maa ki zaahiri shakal-o-soorat se sakht naadim tha. Woh khoobsoorat tau thi magar us ke chehray ke taqreeban pooray daayain hissay par ek gehra zakhm ka nishaan tha.
Larkay ne kabhi yeh jaan’nay mein dilchaspi na li ke maa ke chehray par zakhm ka woh nishaan kab aur kaisay bna tha.
Conference mein, us ki maa ke chehray par zakhm ke nishaan ki bjaaye logon ki bharpoor tawajjoh us ki meharbaan shakhsiyyat aur qudrati husn par rahi magar woh larka abhi tak sharmsaar tha aur khud ko doosron se chhupanay ki koshish kar raha tha. Taa’ham teacher aur maa ke darmiyaan honay waali guftugu achaanak us ke kaan mein parri aur usay apni teacher ka yeh jumla sunaai diya,
”Aapke chehre par zakhm ka nishaan kaisay bna?”
Maa ne jwaab diya,
”Yeh tab ki baat hai, jab mera beta abhi chalnay phirnay ke qaabil na tha. Woh jis kamray mein tha, wahaan achaanak aag lag gayi. Koi bhi andar jaanay ki jurrat na kar ska kyun ke aag qaabu se baahar thi.
May fauran andar bhaagi. Jab may us kay jhoolay ki taraf aagay barrh rahi thi tau aag mein dehakta ek shehteer neechay aatay daikha. May tezi se bachay ki dhaal ban kar us ke aur shehteer ke darmiyaan aa gayi. Zarb lagtay hi may be-hosh ho gyi magar khush qismati se usi lamhay ek fire-man wahaan pahunch gya aur hum dono ko bacha liya.”
Maa ne apnay chehre kay jhulsay hue rukh ko chhua aur boli,
”Zakhm ka nishaan tau hamesha rahay ga lekin mujhay aaj tak apnay is fael par kabhi koi pachtawa nahin hua.”
Woh larka aankhon mein aansoo liye usi lamhay maa ki taraf lapka aur maafi maangi.
Maa ki mohabbat aisa laafaani jazba hai jo maa ke jaane ke baad bhi insaan ke saath rehta hai. Usay har mushkil mein ‘dua’ ki soorat apni maa ki maujoodgi ka ehsaas rehta hai.
Ghabta kay agar dil mai’n b keh daita hoon, “Maa G!”
Foran kisi jaanib say jwaab aataa hai, “Haa’n G!”
(Umair Najmi)
Science kehti hai, bachay ke kuch khuliye hamesha maa ke jism mein reh jaatay hain. Jisay microchimerism kehtay hain. Ya’ni maa sirf bachay ko janam nahi deti balkeh bachcha maa ke wajood ke andar ek aisa ghar bna leta hai jo aakhri saans tak nahi toot’ta.
Yeh mohabbat nahi, rooho’n ka daa’imi ittesaal hai.
Jab yeh bola keh, may bohat khush hoon
Maa ki turbat pay phool khilnay lgay
(Imran Akhtar Saanwal)
🌹 Sharing is Caring 🌹