Yaqeen ho tau koi raasta nikalta hai
Farhaad ko ik azm ne Farhaad kiya hai
Meer Taqi Meer kehtay hain;
Ishq ik Meer bhaari patthar hai
Kab ye mujh naatwaa’n se uthtaa hai
Ishq ek aisi bhaari zimme-daari hai, jo natwaa’n ke kandhay par parrtay hi usay kuchal deti hai. Aur natwaani bhi yahaa’n koi jismaani kamzori ka naam nahi, ye azm-o-himmat ki kami hai. Farhaad ban-nay ke liye Rustam-o-Sohraab sa jussa darkaar nahi hota balkay
’Farhaad ko ik azm ne Farhaad kiya hai.’
Ishq aisa nasb-ul-ain hai, jo insan ko manzil par pahunchnay ke liye be-taab rakhta hai. Wo kisi andesha-e-toofaan se khof khaanay ki bjaaye toofaan ke saamnay datt kar kharri rehnay waali chattaan ban jaata hai.
Ishq wo sabr hai, jo insan ko istaqaamat sikhaata hai. Wo har mushkil aur pareshani par sabr-o-isteqlaal ka muzaahira karta hai.
Milton kehta hai;
’’Wo bhi khidmat kartay hain, jo kharray rehtay hain aur intezar kartay hain.‘‘
Apni binaayi chhin jaanay par Milton be-qraar tha ke ab wo kaam karnay se mahroom ho gya magar aakhir-kar usay ehsas hua;
Khuda ki khidmat sirf sargarm-e-amal rehnay mein nahi balkay sabr-o-raza aur khaamosh rzaa-mandi mein bhi hai.
Hermann Hesse ke kirdar Siddhartha ke baqol sabr ki asal pehchan yahi hai;a
’Main kharra reh sakta hoon. Main intezar kar sakta hoon. Main faaqa kar sakta hoon.’
Ishq wahi pehla qadam hai, jisay uthaanay ke liye aasman sar par uthaanay jaisi himmat chahiye aur zameen ko aasman par day maarnay ki jurrat bhi.
Ishq usi azeem jazbay ka husool hai, jis mein insan jism ki maut ki bjaaye dil ki maut se darta hai.
Ishq hi baadshah bnaata hai
Aur ishq jab apnay maqsad se ho jaaye to insan kaisa bhi muflis ho, ishq usay baadshah bnaa ke chhorta hai.
Balzac adeeb ban-na chahta tha. Us ke waalid ne usay khabardaar kiya;
’’Kya tum jaantay ho, adab mein insan ya tau baadshah banta hai ya phir faqeer?‘‘
Balzac ne jawab diya,
’’Achha ye baat hai. Tau main phir baadshah banoo’n ga.‘‘
Daawa karna aasan hai magar isay saabit karnay ke liye, usi ishq ki zaroorat hai jo aap se apnay maqsad ki takmeel ke liye kharray honay ka hosla, intezar karnay ki jurrat aur faaqo’n ko bardaasht karnay ki himmat maangta hai.
Balzac ke waalidain us ke musannif ban-ne ke faislay se khush nahi thay. Balzac ne khud ko tasleem karwaanay ke liye ek kothri mein likhna shuru kar diya. Us ki pehli tasneef ’Cromwell’ mukammal taur par na-kaam rahi.
Apnay honay ka aitbaar kiya
Aik naqqaad ne in alfaz mein us par sakht tanqeed ki;
’’Ye musannif koi bhi kaam kar sakta hai, siwaaye adab ke.‘‘
Magar Balzac isi falsafay par qaayem raha;
Sab ne radd kar diya tau phir main ne
Apne honay ka aitbaar kiya
(Shaayar: Mir Ahmad Navid)
Us ne apnay m’aashi halaat ki behtari ke liye sansani-khez aur tijaarati novels bhi likhay. Kaaro-baar mein bhi khud ko aazmaya magar na-kaami aur pur-tayyush zindagi guzaarnay ke shauq ne usay qarz mein mubtala rakha.
Aur phir wo takhleeqi kaam mein din raat masroof rehnay laga. Roz musalsal solah ghantay likhta rehta.
Us ne duss baras tak tangi aur muflisi ke sath hol-naak jang larri aur tab tak larta raha jab tak fatah hasil nahi hui. Aur ye fatah usay un chaalees novels ki takhleeq ke baad mili jo na-kaam ho chukay thay.
Bojh wo na-twaa’n uthaa laaya
Us ke baadshah ban-nay ka azm, is baat ki toseeq thi;
Us mein ishq ke bhaari patthar ko uthaanay ki himmat thi, aur us ne apnay talent se zyada apni saabit-qadmi se is baat ka amli saboot pesh kiya.
Wo khud kehta tha;
’’Azeem quwat-e-iraadi ke bghair azeem talent jaisi koi cheez wajood nahi rakhti.‘‘
Aur
’’Jab hum apni taaqat par shak kartay hain tau hum apnay shak ko taaqat-war bnaa daitay hain.‘‘
Yaqeen ho tau koi raasta nikalta hai
Hwaa ki autt bhi lay kar chiraagh jalta hai
(Shaayar: Manzoor Hashmi)
🌹 Sharing is Caring 🌹