Wohi jahaa’n hai tera jis ko tu kray paida

​Har amal ki shuruaat hamesha dimaagh mein ek choti si soch ya iraaday se hoti hai. Mushkil waqt mein agar aap apnay dimaagh par qaboo rakhen toh yeh mushkil waqt se nikalnay mein aap ki madad karta hai.

​Barray azaaim ke husool ke liye apni dimaaghi taaqat ko ek jagah markooz karna agarcheh mushkil kaam hai lekin yahi kaam hmain kamyaabi ki taraf le jaata hai. Bairooni halaat par control na honay ke bawajood, apnay radd-e-amal aur soch par control hmain naqabil-e-shikast bna deta hai.

Insaan ka dimagh uski sab se barri taaqat hai aur yeh aisay tasawwurat aur khwaab dekh sakta hai jo pahadon ko hila saktay hain aur namumkin ko mumkin bna sakte hain.

​”Dimaagh hi hadd hai. Jab tak dimsagh yeh tasawwur kar sakta hai ke aap kuch kar saktay hain; aap woh kar saktay hain.” (Arnold Schwarzenegger)



​Korea ki jung mein shadeed zakhmi honay wala ek Amreeki foji kayi haftay hospital mein maflooj parra raha. Apni aankhon aur jabrray ke siwa woh becahara jism ke kisi hissay ko harkat dainay ke qaabil na raha tha.

Usay dar tha, agar woh aisay hi parra raha toh uska dimaagh jwaab de jaye ga. Sau, us ne apne bistar ke upar hi ek book rack banwaaya taa ke woh mutala’a kar sakay.

​Kuch arsay baad us ke zehn mein ek aur khyaal aaya.
​Usay typing seekhnay ka hamesha se shauq tha isl iye us ne darkhaast ki ke is rack mein typing text book rakh di jaye. Us ne tezi se typewriter key-board ko hifz kar liya aur phir apne takhayyul mein, apni ungliyon se un alfaaz ko type karta jaata jin ki mashq kitaab ke mutaliqa safhay par di gayi hoti. Jism ko harkat dainay se maazoor, bistar par parray parray woh bahaadur sipaahi apne takhayyul mein roz bees, tees minute practice karta.

​Kayi maah tak, taweel physical therapy ke baad, woh maflooj mareez bil-aakhir apne haath paao’n ko harkat dainay mein kamyaab hua.

​Apni typing ki mahaarat parakhnay ke liye us betaab naujawan ne seedha hospital office ka rukh kiya aur wahaan typewriter istemaal karnay ki ijaazat chaahi
.
​Zindagi mein pehli baar, uss ne typewriter mein kaaghaz daala aur apni ungliyan typewriter par usi tarteeb se rakh dee’n jis tarah woh apnay takhayyul mein roz mashq kiya karta tha. Us ki ungliyan harkat mein aa gayee’n, aur apni pehli hi koshish mein baghair koi ghalti kiye us ne ek minute mein pachpan alfaaz likh daalay.