Woh haath ab sr-e-dastak pohanch gya ho ga
Carl Rogers ke khyaal mein; acchi zindagi koi manzil nahi balkeh ek amal hai. Yeh ek samt hai, koi mqaam nahi.
Aur jab yeh amal insani hamdardi ka jazba ikhtiyar kar jaata hai, tau phir moajizay hi moajizay ru-numa hotay hain. B’zaahir yeh ek narm jazba hai magar itna taaqat-war ke dil ki sakht tareen deewaron ko bhi gira deta hai.
Hamdardi khud-gharzi ke qaid-khaanay se rihaai paa kar hum-aahangi ki kaainaati mehfil mein daakhil honay ka darwaza hai.
Rumi kehtay hain;
Doosron ka dard apnao taa-ke tum apnay dard se nijaat haasil kar sko.
ta keh mujh ko na mairay dukh ki sdaaye’n aaye’n
Ab may sunta hoon lga-taar kisi aur ka dukh
(Sajid Raheem)
Yeh kahaani Lewis Lawes aur us ki ahliya Catherine Lawes ki hai. Lewis Lawes 1921 mein, America ki khaufnaak Sing Sing Jail mein Warden muqarrar kiya gya. Bees bars baad jab Lewis Lawes ne retirement li tau yeh jail insaani hamdardi ka ek roshan iste’aara ban chuki thi.
Naqaadon ke nazdeek is ka sehra Lewis Lawes ke sar jaata tha magar us ne aajizi se kaha,
Yeh sab Catherine ki badaulat mumkin hua jo is jail ke qareeb hi dafan hai.
Catherine tab teen chhotay bachchon ki maa thi.
Sab ne usay mna kiya ke woh jail ki deewaron ke andar qadam rakhnay ki ghalti na karay magar woh baaz na aayi.
Us ka khyaal tha;
“Chunkay mera shauhar aur may in qaidiyon ki dekh-bhaal kar rahay hain, mujhay yaqeen hai, qaidi bhi mera khyaal rakhen gay.”
Catherine ne har qaidi ke jurm ka record parrha. Har ek ki kahaani jaani aur qaidiyon ke liye ek dard-mand maseeha ban gayi.
Kehte hain; Hamdardi woh zabaan hai jo behray sun saktay hain aur andhay parrh saktay hain.
Us ne ek naabeena qaidi ka haath thaama aur intehaai sabr-o-tahammul se usay Braille se parhna sikhaaya. Barso’n baad tak, woh qaidi Catherine ki is mohabbat-o-shafqat par us ke liye ehsaan-mandi ke aansoo bahaata raha.
Is dard-mand maseeha ne samaa’at se mehroom ek qaidi ke liye ishaaron ki zabaan seekhnay ke liye khud ek school mein daakhila liya aur phir usay sikhayi.
Kayi bars tak woh un qaidiyon ki zindagi mein umeed ki shma jalaati rahi. Un ke dard baant’ti rahi. Un ke liye hausla bani rahi.
Yaqeenan Catherine jab bhi un ke paas aati hogi, us ke aanay se pehlay hi us ke be-laus khuloos aur insaani hamdardi ki mehak qaid-khaanay ki dehleez tak aa jaati ho gi jis ke moajizaati asar se qaidiyon ki beemaar aur sharm-saar roohai’n islaah ki umeed mein jee uth’ti hongi.
mehak si aayi hai, dahleez se tamanna ki
Woh haath ab sr-e-dastak pohanch gya ho ga
(Akhtar Usman)
Lekin phir ek almanaak car haadsay mein Catherine ki maut ho gayi. Us ki mayyat qaid khaanay se koi paun meel ke faaslay par us ke ghar mein rakhi thi, lekin jail ki saari fiza ghamgeen aur sogwaar thi. Lewis duty par nahin aaya aur Nayab Warden ne us ki jagah duty di. Maamool ki chehel qadmi ke dauraan Nayab Warden ne dekha, main gate par qaediyon ka hujoom bebasi aur gham ki tasveer bane khada tha.
Yeh sakht dil qaediyon ki Catherine ke liye apni gehri aqeedat ka saboot tha. Us ne un par reham ki nigaah ki aur ek taarikhi faisla kiya:
”Chalo theek hai, tum sab aakhri rasoomaat par ja saktay ho, magar waada karo keh raat honay tak waapas aa jao gay.”
Aur phir ek mojza hua.
Baghair kisi nigaaraan ke, qaediyon ka woh pur-amn juloos paidal chalta hua Catherine ki aakhri rasoomaat mein shaamil hua aur dil ki gehraiyon se apnay maseeha ko khiraaj-e-aqeedat pesh kiya. Us ke baad har qaidi waapas jail mein aa gaya. Kisi ne bad-nazmi nahi ki. Koi ek faraar na hua. Har aik waapas aa gaya. Har aik.
🌹 Sharing is Caring 🌹