Warna har zehn mai’n kuch taaj mahal hotay hai’n

​Fitri taur par insaan ek samaaji makhlooq hai. Aik doosre se waabasta mafaadaat aur jazbaat ka khyaal rakh kar insaan apnay samaaj ko ikhlaaqi taur par paaidaar banaata hai. Doosro’n ki madad karna na sirf insaan ki apni zaat ko taskeen deta hai balkay smaaj mein khair o barkat ka baa’is banta hai aur ijtemaai bqa ko mustahkam karta hai. Majmooi tanhaai kay marz se nijaat milti hai aur pooray smaaj mein ek wahdat ka ehsaas paida hota hai.

B’qol S.L. Elder;
“Duniya ke ahem tareen kaamo’n mein se aik yeh hai ke aap logo;n ko btaaye’n, woh akailay nahi hain.
Is tarah b’zaahir aap doosron ki madad kartay hain lekin asal mein aap apni madad kar rahay hotay hain.”



​Kai bars qabl, toofaani raat mein, buzurg miya’n biwi sik hotel ke andar daakhil huay aur kiraaye par aik kamra lena chahaa tou clerk ne afsos ka izhaar kiya;
“Maaf kijiye ga, kuch business meetings ki wajah se saaray kamray book hain.”
Kuch dair khaamoshi rahi.
Phir jab clerk ne buzurg miyan biwi ke chehray par maayoosi kay aasaar dekhay tou bola,
“Aisay toofaani mausam mein, aap jaisay khoobsoorat jorray ko waapas bhejnay ka mera dil nahin chaah raha. Acha yeh btaaye;n, kya aap maitay kamray mein theharna pasand krain gay?”

Woh jorra is tarah us clerk ko takleef denay par aamaada nahi tha magar kuch dair guftugu kay baad clerk ne unhein raazi kar liya.

Aglay roz, aadmi ne bill ada kiya aur hotel chortay waqt clerk se kaha,
“Tum ek kam-yaab heeray ho aur har hotel kay maalik ka khaab hota hai, us ke paas aisay mulaazim hon; shaayad kisi roz may sirf tumhari wajah se ek barra sa hotel banwau’n ga.”

Clerk ko khushgawaar hairat hui magar yeh khyaal aisa afsaanvi tha ke woh boorrhay ki is baat par halka sa muskura diya.


​Chand saal baad, clerk ko usi boorhay ka khat masool hua.​ Boorhay ne khat mein us toofaani raat mein clerk ki meherbani aur mezbaani ka tazkira kiya tha. Us ne clerk ko New York aanay ki daawat di. Boorhay ne khat mein New York ke liye ticket bhi bhaij rakha tha.

​Kuch din baad New York pohanchnay par Fifth Avenue kay corner mein, clerk ki apnay is boorhay dost se mulaqaat hui jahaan aik shaan-daar nayi imaarat taameer ki gayi thi.

Boorhay ne is imaarat ki taraf ishaara kartay huay kaha,
“May ne yeh hotel is liye taameer kiya hai ke tum jaisa mehrbaan insaan isay chlaaye. Yaad rahay, kuch saal pehlay may ne tumhein aisa kaha tha, aur aaj dekh lo, may waqai sanjeeda tha.”

​Clerk hairat se bola, “Janaab, aap mazaaq kar rahay hain na. Kya is mein koi chaal hai? May hi kyun? Waisay, aap hain kon?”

​”Mera naam William Waldorf Astor hai aur meri koi posheeda chaal nahi, bas mujhay tumhaaray jaisay heeray ki zaroorat hai.”
​Is azeem-ush-shaan hotel ka naam Waldorf Astoria tha aur woh clerk George C. Boldt tha. Jis ne apni mehnat aur lagan se hoteling kay shobay mein khoob naam kamaaya.


​George C. Boldt Germany mein paida hua aur taqreeban tairah bars ki umar mein America chla gya. Us ki zindagi azm o himmat ki amli daastaan hai. Us ne ibtedaai taur par ek bus-boy aur dishwasher ke taur par kaam kiya.

Woh Waldorf Astoria hotel ka pehla General Manager tha. Us ne jadeed hotel management ke usool mutaarif karwaaye. Amriki samaaj ke m’aashi manzar naamay par us ki shakhsiyat ka gehra asar hai.
Boldt ne hotel mein ‘Mehmaan-Nawazi’ kay tasawwur ko markazi haisiyat di.


​Woh apni shareek-e-hayaat se be-panaah mohabbat karta tha. 1900 mein us ne apni Ahliya Louise Boldt ke liye New York ke Thousand Islands mein ek shaan-daar qila taameer karwaana shuru kiya. Us ka naam ‘Boldt Castle‘ rakha gya.

Bad-qismati se qila mukammal hone se chand maah qabl Louise ka inteqaal ho gaya. George Boldt ne fauri taur par taameer band karwa di aur phir is jazeeray par qadam nahi rakha. Us ne hidaayat ki, ab qila kabhi na mukammal kiya jaaye.