Mohabbat karnay waalo’n ki yaad mai’n

Yeh tehreer un gum-naam mohabbat karnay waalo’n ki yaad mein hai;
jo haq ki khaatir tareek raaho’n mei’n roshni bakhaitay huway chup chaap soo’vay adamm rwaana huway.
Jo khud ko haar kar insaaniyat ki jeet bnay.
Jin ki sachaai ki tashnagi zeher ke pyaalo’n se bhi na bujhi.
Un be-naam sipaahiyo’n ki yaad mei’n, jo har lahza daar se uljhtay rahay magar phir bhi mansab-e-Mansoor un kay hissay mei’n na aaya.

Jo umr bhar kisi maqsad ki khaatir nihattay reh kar bhi aik khaamosh jang lartay rahay.
Jo palko’n mei’n ratjago’n ke bojh liye zamaanay bhar ko neendai’n baant’tay rahay.
Jo maseeha thay, chaara-gar thay magar beemaar mua’shray ki laa-ilaaj fraamoshi kay marz ka shikaar huway.
Jo usoolo’n par samjhauta na karnay ki wajah se zindagi bhar be-thikaana rahay aur maut se hi thikaanay lagay.
Jinho’n ne hansi khushi khud ko apno’n mei’n baant diya aur apnay hissay mei’n khud bhi na aa sakay.
Jin kay andar apni hi dafnaai hui cheekho’n ka qabristaan tha lekin woh doosro’n kay liye gulistaan ban mehaktay rhay.
Jo waqt kay katbay par kandah tau nahi magar waqt ki auqaat se kahi’n pray be-niyazi se jiye.

Un na-gufta beh azeem hastiyo’n ki yaad mei’n hai, jo apni aasteeno’n mei’n “Yad-e-Baiza” liye hmaaray ird-gird maujood rahee’n magar hmaاri ehsaan-fraamoshi kay black-hole mei’n un kay baatin ki roshni pohanch hi na saki.
Jin kay zarf ka qad kam-zarf bonay kabhi jaan hi na paaye.
Jo sabr kay phhal ka luqma chakhnay se pehle hi luqma-e-ajal huway.
Jin ka kirdaar kisi razmiya se kam na tha magar tareekh unki azmat kay aitiraaf mei’n aik one-liner likhnay se bhi guraizaa’n rahi.
Jo un-suni dhuno’n se kahi’n zyaada dilkash aur sheeree’n thay lekin zmaanay ki bay-hisi kay shor mei’n kisi ko sunaai hi na diye.
Jinho’n ne doosro’n kay jazbay ki har daak kisi imaandaar postman ki tarah barwaqt manzil manzil pohanchai magar apnay ehsasaat aur jazbaat ko maslehato’n ki almaari ke dead-letter section mei’n rakh kar hamesha kay liye taaq-e-nisyaa’n mei’n prray rahay.
Jo har pukaar par labbaik kehnay kay ba’wajood khud gumshuda baazgasht ban kay jiye.
Jo auro’n kay liye hmah-waqt saraapa-dua rahay magar apnay liye unhai’n kabhi koi “harf-e-dua” yaad hi na raha.

Un kirdaaro’n ki yaad mei’n hai, jin kay hissay kay mukaalmay bhi koi aur bol gaya.
Un mehroom-e-tamanna maskharo’n ki yaad mei’n hai, jo kahasni mei’n mahz hansaanay kay liye aaye aur parda girnay se pehlay hi hansi mei’n urraa diye gaye.
Un tmsashasio’n ki yaad mei’n hai, jin kay hissay mei’n mahz taaliyaa’n bjaanay ka kirdaar aaya aur unho’n ne apna woh kirdsar bhi stage ke performers se kahi’n behtar nibhaaya.

Aur jin kay paas “Naqsh-e-Faryadi” ban’nay ki sahulat tau thi magar unho’n ne mahz “Naqsh” banay rehnay par iktifaa kiya aur chupkay se kisi kay khaak uraatay qadmo’n ki khaak huway.

Aur jinho’n ne umer bhar sataaish ki har khaahish ko apni thokar par rakha lekin phir jaanay kis mehrbaa’n nafs ki yaad mei’n aakhri thokar kha kar idhar udhar bay-bsee se nigaah dauraatay aur zair-e-lab yeh nauha parhtay hamesha kay liye rukhsat huway: