Khud ko baar baar mat dohraaiye.

Un-kahay alfaaz hmaaraay qaidi hotay hai’n aur jab zubaa’n se adaa ho jaaye’n tau phir hmaaray aaqa ban jaatay hai’n.”
Apni guftugu mei’n ikhtisaar baratiye. Khud ko baar baar mat dohraaiye. Kisi ko koi waqea sunaa chukay to usay baar baar dohraa kar doosro’n ki samaa’at ko aziyat se dau’chaar mat kijiye.

Aik siyasat-daan dau ghantay se taqreer kar raha tha. Aik shakhs wahaa’n pahuncha aur apnay dost se poocha,
“Yeh abhi tak taqreer kar raha hai? Aakhir is ki guftugu ka mauzoo kya hai?”
Dost ne bay-bsee se jwaab diya,
“Ptaa nahi, us ne abhi tak tau nahi bataaya.”

Kayi taqreebat, m’haafil, ijtima’aat waghaira mehz is liye uktaa’hutt ka baa’is ban jaatay hai’n keh mukhaatib bas bol hi rahaa hota hai.


Winston Churchill ko aik baar Oxford University ne apni taqreeb mei’n khitaab ki daawat di. Jab Churchill stage par jalwa-gar hua to har taraf taaliyo’n ki goonj sunaai day rahi thi. Us ne dono haath lehra lehra kar apnay madaaho’n ka shukriya adaa kiya aur phir joo’nhi us ne khaas ada se apna hath podium par rakha tau har taraf aik dam khaamoshi chhaa gayi.
Churchill ne aik baar charo’n taraf saama’een par nazar ki aur phir woh azeem muqarrir yak’lakht dhaara,
“Kabhi haar na maano.”

Kuch seconds khaamoshi rahi aur phir woh panjo’n kay bal oopar uthha aur wahi alfaaz dohraaye,
“Kabhi haar na maano.”

Us kay garj-daar lehjay ne saama’een mei’n wajd sa taari kar diya. Us kay baad phir se khaamoshi chha gayi aur Churchill shaan-e-beniyaazi se stage se neeche utar gya.
Us ki purmaghz taqreer khatm ho chuki thi.