Kehnay waalay theek kehtay hain sabhi apni Jgaah
Bsaarat wohin tak kaam karti hai, jahaan tak bseerat sath deti hai.” (Robert Davies)
Khush Qismati Waham Hai, Mahaarat Nahi
Aik kisan apni pasandeeda gaaye ke baaray mein fikr-mand hai. Us ki pareshani mahsoos kar ke gwaala usay btaata hai ke wo abhi udhar se hi aaya hai, gaaye khait mein khushi se char rahi hai. Ye sun kar kisan kahta hai, wo ninaannvau (99) feesad andaazay par bharosa karnay ki bjaaye is daaway par sau (100) feesad yaqeen chaahta hai. Wo khud darwaazay se baahar nikal kar duur darakhton ke peechay aik safaid aur siyah shakal dekhta hai aur apni gaaye ko duur se hi pahchan leta hai.
Gwaala kahta hai, wo bhi dobaara ja kar check kray ga. Wo khud khait mein chla jaata hai. Wahaan dekhta hai ke gaaye aik garrhay mein jhaari ke peechay so rahi hai. Usay hairat hoti hai, darwaazay se tau ye bilkul nazar nahi aa sakti thi. Phir wo darakht mein phansa hua safaid aur siyah kaghaz ka aik bahut brra tukra dekhta hai. Jisay kisan ne gaaye samajh liya tha.
Kisan ne duur se apni ankhon se gaaye ko dekh kar yaqeen kar liya tha ke gaaye khait mein hi hai aur gaaye waqayi wohin thi.
Lekin masla ye hai ke kisan ka ‘jwaaz’ ghalat tha. Us ne duur se kaaghaz ka brra sa tukrra dekha tha, gayae nahi. Sirf khush qismati se sach honay waali is baat ko ‘ilm’ nahi kahaa ja sakta.
Dar-haqiqat, usay apni gaaye dekhnay ki tarrap is qadar thi ke us ke dimagh ne aik bay-jaan kaaghaz ko gaaye ki shakal mein dikha diya. Isay Cognitive Closure kahte hain, yani dimagh adhoori maloomat ko apni marzi se mukammal kar leta hai. Kisan ko yaqeen tau ho gya ke wo jaanta hai, lekin wo takneeki taur par nahi jaanta tha.
Asal mein, schaayi tak pohnchnay ka raasta bhi itna hi aham hai, jitni ke wo sachayi khud.
Aap ghalat rastay par chal kar sahi manzil par pohanch bhi jaayen tau ye aap ki mahaarat nahi, mahz aik ittefaq hai.
”Khush qismati ka masla ye hai ke ye wahaan bhi mahaarat ka waham paida kar deti hai jahaan haqiqat mein koi mahaarat maujood nahi hoti.” (Daniel Kahneman)
Kehnay waalay theek kehtay hain sabhi apni Jgaah
Falsafay ki duniya mein isay Gettier Problem kahaa jaata hai. Edmund Gettier ne apne aik mqaalay mein saabit kiya, jisay hum ‘ilm’ samajhtay hain, wo mahz aik ‘khush qismati’ bhi ho sakti hai.
Aflatoon ke zmaanay se yahi maana jaata tha, agar aap ke paas ye teen cheezain hain tau aap ke paas ‘ilm’ hai:
Aqeeda: Aap kisi baat par yaqeen rakhtay hon.
Jwaaz: Aap ke paas us baat ko maan-nay ke liye koi thos wajah ho.
Schaayi: Wo baat haqiqat mein sachi ho.
Gettier ke khyaal mein, kabhi kabhi ye teeno’n cheezain aap ke paas honay ke bawajood, aap isay ilm nahi keh saktay. Kyun ke kisi baat ka sach sabit ho jaana, faqat ittefaq bhi tau ho sakta hai.
Farz karain, kisi kamray ki diwaar par aap aik gharri dekhtay hain. Gharri 10 bajay ka waqt dikha rahi hai.
Aqeeda: Aap yaqeen kar laitay hain ke 10 bjay hain.
Jwaaz: Aap ne gharri dekhi hai, jo aik thos saboot hai.
Schaayi: Ittefaq se us waqt waqayi 10 bjay hain.
Lekin agar wo gharri kuch din se khraab parri hai aur 10 bjay par ruki hui hai tau?
Aap ka aqeeda scha nikla aur aap ke paas is ka maqool jwaaz bhi hai lekin kya aap ko waqai ‘ilm’ tha ke 10 bjay hain?
Nahi…………..
Aap ne tau ittefaq se theek us waqt gharri par waqt dekha jab haqiqat mein 10 hi bjay thay.
Kuch na kuch sachayi hoti hai n’haa’n har baat mein
Kehnay waalay theek kehtay hain sabhi apni Jgaah
(Shayar: Anwar Shaoor)
’Khush qismati’ ilm ka hissa nahi ho sakti. Aap ki maloomat kisi ghalat buniyaad par ustwaar hon, tau chaahay wo ittefaq se sachi bhi sabit ho jaayen, wo ilm nahi kehlaaye’n gi.
Zhuangzi kahta hai, jab aankh par koi parda na ho to nateeja ‘beenaayi’ hai aur jab aql par koi parda na ho to nateeja ‘schaayi’ hai.
Ilm sirf wo hai jo aik ghair-muta’assib zehan, shaffaaf maahol mein bghair kisi dhokay ke hasil kray.
”Hmain wo baatain mushkil mein nahi daalti’n jinhein hum nahi jaantay, balkay wo baatain lay doobti hain jinhein hum yaqeeni sach samajhtay hain haala’n keh wo sach nahi hoti’n.” (Mark Twain)
🌹 Sharing is Caring 🌹