Jo thehray zra, kuchal gaye hain

Insaan ki zindagi aik musalsal daurr hai. Woh har mumkin takleef se bachaao aur har munn-pasand lazzat kay husool kay liye musalsal harkat mein rehta hai.

Kamiyaabi ki khaahish aur mehroomi ka khauf, aisi quwwatai’n hain jo usay hma-waqt jido-jehad karnay par majboor karti hain. Yeh challenges har zinda cheez ko chaukass rakhtay hain. Zindagi mein thehraao tabhi aata hai, jab hum khauf aur khaahish ki taskeen kay darmiyaan t’waazun paida karnay ki koshish kartay hain.

Jadeed m’aashi nizaam mein bhi har fard ko apnay m’qaam par qaaim rehnay kay liye doosro’n se taiz bhaagna parrta hai. Apnay aaj ko guzashta kal se aur ainda kal ko aaj se behtar bnaana parrta hai.


Amreeki Steel Mills kay azeem businessman Charles M. Schwab ne Andrew Carnegie ki ma’tahti mein apnay career ka aaghaaz kiya. Us ne zindagi mein jo bhi seekha us par woh Andrew ka bohat zyaada ehsaan-mand tha. Us kay khyaal mein us ki kamiyabi ki asl wajah wohi tha. Schwab aur us kay saathi apnay kaam mein bohat zyaada mahaarat rakhtay thay.
‘Aik roz, woh barray fakhr se Carnegie kay paas gya aur bola:
“Kal, hum ne saabiqa saaray records torr diye.”
Yeh sun kar Carnegie ne Schwab se aik swaal kiya, jis ne usay yak-sar khaamosh aur la-jawaab kar diya.
Andrew ne poocha,
“Yeh tau kal ka kaar-nama hai, magar yeh bataao, aap ne aaj kya kiya hai?”


Is baat ka yeh matlab har-giz nahi ke zindagi ki bhaag daurr mein insaan khud ko sirf aik machine bna lay.
Chaahay khaahish kamiyaabi ki ho ya na-kaami ka khauf, eit’daal ka daaman haath se chhootay tau insaan aik la-haasil junoon mein mubtla ho kar zehni iztiraab aur thakan ka shikaar ho jata hai.
Magar daurr-dhoop bahar’haal zaroori hai — apni hasti ki bqa ke liye.


Agar zamaanay mein taghayyur ko hi s’baat hai, agar chalnay waalay aagay nikal jaatay hain aur thehrnay waalay kuchal jaatay hain aur agar harkat mein barkat hai tau phir hmaari bqa rozaana ki tag o dau mein hai.

Agar hum is mayaar par pooray nahi utartay tau hmaaray liye yahi nauha baaqi bachta hai;