Ik zindagi amal kay liye bhi naseeb ho

Poocha gya, paanch maindak aik motti lakri par baithay thay. Chaar ne chhlaang lagaanay ka faisla kiya. Ab kitnay bachay?
Jwaab mila: paanch.
Phir swaal hua: kyun?
Kyun ke “faisla karnay” aur “amal karnay” mein farq hota hai.


Niyyat kisi bhi kaam kay liye bohat ahem hai lekin sirf niyyat kar lainay se haqeeqat nahi badalti. Aik achhay iraaday ko jab tak amali jaama na pehnaaya jaaye, woh bai-nteeja rehta hai. Hum aksar apni zindagi badalnay kay liye “faislay” tau kar laitay hain, magar un faislo’n par amal dar-aamad nahi kartay.

Faisla sirf ek dimaaghi amal hai aur isay takmeel mein laanay kay liye jismaani aur zehni twaanai ko yakja karna parrta hai. Janam din, saal-girah aur aisay hi jazbaati lamho’n mein hum aksar barray barray mansoobay bna laitay hain lekin unhain amali tor par aaghaaz karnay ki himmat nahi kartay.

Aisay hi maindako’n ka lakrri par baithna un ki maujooda haalat ya aadat ho sakti hai. Is aadat ko torrnay kay liye sirf faisla kaafi nahi, balkay ek mazboot tehreek aur khud par qaboo zaroori hai.

Soch ko faislay aur faislay ko amal mein badal kar hi aagay barrha ja sakta hai. Faisla karnay waalay duniya mein bai-shumaar log hain magar amal karnay waalay hamesha qaleel tadaad mein hotay hain.

Amal kay baghair faisla ek khaahish bunn kar reh jaata hai. Aur phir waqt kay saath saath yahi khaahishai’n hasrato’n mein badal jaati hain jo dil-e-daagh daagh ko mazeed daagh-daar karti jaati hain.
Amal khushi ki zamaanat tau nahi magar is kay baghair khushi bhi mumkin nahi.

Shaayar ne baja kaha tha: