Hum yahaa’n aik doosray ki wajah say hai’n.
Aik shaam Mulla Nasruddin sunsaan sarak par tanha paidal chal rahay thay. Chaltay chaltay achaanak Mulla ne daikha, kuch swaar unki taraf aa rahay hai’n. Mulla kay jism mei’n khauf ki sansani khaiz leher daurri aur unhai’n foran khyaal aaya ke woh log unhai’n zabardasti fauj mei’n bharti kar lai’n gay, ya phir ghulaam bna kar baich dai’n gay.
Unho’n ne mumkinah khadshaat se bachnay kay liye daurr laga di. Saamnay qabristan ki diwaar phalaangi aur aik khuli qabr mei’n jaa kar lait gaye.
Un swaaro’n ne yeh saara manzar daikh liya tha. Woh Mulla kay is tarz-e-amal par bohat hairaan huay aur un kay is rad-e-amal ki wajah maloom karnay kay liye un kay peechaay aa gaye.
Qabr mei’n laitay huay Mulla ka poora wujood kaanp raha tha.
Neik sift musaafiro’n ne un se swaal kiya,
“Aap bhaagtay huay achaanak is qabr mei’n kyu’n lait gaye? Sab khairiyat hai? Kya hum aapki koi madad kar saktay hai’n?”
Mulla ne apni ghabraahat par qadray qaboo paatay huay jwaab diya:
“Har sawal ka jwaab seedha aur aasaan nahi hota. Tumhari jaankaari kay liye bus itni baat kahoo’n ga , may yahan tum logo’n ki wajah se hoo’n, aur tum log yahaa’n meri wajah se ho.”
Kabhi kabhi chand afraad kahi’n par agar mukhtasir ya taweel waqt kay liye ikatthay hotay hai’n tau is kay peechay kai wajahai’n hoti hai’n. Woh apnay apnay mufaadaat, tawakku’aat, khadshaat ya mahz ittefaaqaat ki wajah se ek doosray kay saath jurray hotay hai’n.
Magar aksar hum doosro’n ko jaanay baghair un kay baaray mei’n bad-aitmaadi qaaim kar kay khud ko apni hi zinda qabr mei’n dhakail daitay hai’n.
‘Hatta ke jab woh log hmaari madad kay liye idhar bhi aa pahunchtay hai’n tau foran sharmindagi ka yeh ehsas ghalib aa jata hai, ke woh tau hmaari overthinking kay bilkul bar’aks niklay.
Yeh Mulla ki khush-naseebi thi ke unhai’n haqeeqat ka idraak asli qabr mei’n ponchnay se pehlay ho gya, lekin samaaj mei’n beshumar aisay log hai’n jo doosro’n kay mutalliq bay-bunyaad khauf aur bad-gumaaniyo’n kay bojh tlay aa kar khud ko tanhaai ki qabr mei’n dafn kar laitay hai’n, aur phir apni bad-gumaaniyo’n ka kafan oorrhay waaqaitan qabr mei’n ja pohnchay hai’n.
Yeh almiyah doosro’n ke baaray mei’n hmaari bay-bunyaad overthinking ki wajah se janam laita hai, aur is ka zimmay-daar kisi aik fareeq ko thehraaya nahi ja sakta.
Daraasl, miscommunication aur discommunication ki wajah se ghalat fehmiyaa’n barrhti jaati hain.
Discommunication ki brri wajah Jon Elia ne byaan kar di:
Aik hi haadsa tau hai aur woh yeh ke aaj tak
Baat nahi kahi gayi, baat nahi suni gayi
Aur miscommunication ke baaray mei’n Charaagh Hassan Hasrat kehtay hai’n:
Ghairo’n se kahaa tum ne, ghairo’n se sunaa tum ne,
Kuch hum se kahaa hota, kuch hum se sunaa hota
Sach yeh hai, hum sab Mulla ki tarah ek doosray kay sabab hi ek jagah par ikatthay hai’n.
Zindagi ki bunat hi baahmi rishto’n aur mush’tarka wujood par qaaim hai.
Asal swaal yeh hai:
Kya hum kisi ke baaray mei’n bila-wajah bad-gumaani ki wajah se khud ko na-umeedi ki qabr mei’n tau nahi dhakail baithay?
Ya kahi’n aisa tau nahi ke koi aur hum se bad-gumaan ho kar apni tanhaai ki qabr mei’n jaa soya ho?
Dono soorto’n mei’n nijaat ka yahi raasta hai:
Hum ek doosray ko sunai’n, samjhai’n, aur sehat-mand mukaalmay ki riwaayat qaaim karai’n.
Yuu’n hum apnay apnay khud-saakhta jahannum se nikal kar zameen ke is tukray ko jannat bna saktay hain.
Maan liya;
“Bain-un-nujoom” faaslay insaan brri taizi se kam karta jaa raha hai,
Magar;
Is taraqqi mei’n bhi khsaara hi khsaara hai, agar hum ne “bain-ul-quloob” barhtay huay faaslo’n ki fikr na ki.
🌹 Sharing is Caring 🌹