Hum wohi hain, “jo ‘intikhaab’ kia”
’’Us shakhs ke liye koi shay kaafi nahi hoti, jis ke nazdeek ’kaafi‘ bhi na-kaafi ho. (Epicurus)
Hain kwaakib kuch nazar aatay hain kuch
Ek baadshah ne faisla kiya ke woh apni daulat ka kuch hissa kisi dunyavi gharz ke baghair khaalisatan khuda ki raah mein khairaat karay ga. Saath hi woh ye bhi dekhna chaahta tha ke is khairaat ka anjaam kya hota hai. Chunan’cheh us ne ek qabil-e-itmad naan-baai ko bulaaya aur usay dau rotiyan tayyaar karnay ka hukm diya. Ek roti ke andar kuch baish-qeemat jwahiraat goondh diye gye, jab ke doosri roti sirf aatay aur paani se tayyaar ki gayi.
Ye dono rotiyaa’n un dau afrad ko di jani thee’n jo naan-baai ki nazar mein sab se zyaada aur sab se kam muttaqi hon.
Agli subah dau aadmi tanoor par hazir huay. Ek ne darwaishaana libas pehan rakha tha aur nihaayat paarsa maloom hota tha, halan ke haqeeqat mein woh mahz riya-kaar tha. Doosra shakhs, khamosh tba tha. Ittefaq se chehray ki mushabihat ki wajah se woh naan-baai ko us ke kisi na-pasandeeda shakhs ki yaad dila raha tha.
Jaisay hi is munafiq darwaish ko roti mili, woh usay hath mein tolnay aur tatolnay laga. Usay mehsoos hua, roti mein aatay ki guthliyan reh gayi hain. Jab us ne wazn kiya to jwaahiraat ki wajah se usay roti zaroorat se zyaada bhaari lagi. Us ne naan-baai ki taraf dekha aur bhaanp gya, ye koi mamooli aadmi nahi hai jis se bai-takallufi ki ja skay. Chuna’n-cheh woh doosray shakhs ki taraf murra aur bola;
’’Kyun na tum apni roti meri roti se badal lo? Tum bhookay maloom hotay ho aur ye roti size mein brri hai.‘‘
Doosra shakhs, jo taqdeer ka har faisla qubool karnay par aamaada tha, khushi khushi roti badalnay par tayyaar ho gya.‘‘
Badshah jo drwaazay ki darz se ye manzar dekh raha tha, hairan tau hua magar dono afraad ki baatini kaifiyat na samajh paaya.
Yun munafiq darwaish ke hissay mein saada roti aayi. Badshaah ne ye natija akhaz kar liya taqdeer ne darwaish ko daulat ke fitnay se duur rakhnay ke liye mdaakhlat ki. Doosri taraf, haqeeqatan naik insan ko jwahiraat mil gye aur woh in ka behtareen istemal karnay ke qabil ho gya.
Baadshah is waqiye ki guthi na suljha ska.
Naan-baai ne arz ki;
’’Main ne woh kiya jo mujhay hukm hua tha.‘‘
Badshah bola;
’’Taqdeer ke kaam mein dast-andazi nahi ki ja sakti.‘‘
Aur munafiq darwaish ne dil mein kaha;
’’Wah! Main kitna chalaak tha. (Idries Shah)
Hain kwaakib kuch nazar aatay hain kuch
Daitay hain dhoka ye baazi-gar khula
(Shaayer: Mirza Ghalib)
Hum wohi hain, “jo ‘intikhaab’ kia”
B’qol Sartre, “Insaan kuch bhi nahi hai, siwaye is ke jo woh apne intekhaab se khud ko bnaata hai.” Munafiq darwaish apni hoshiyari ke takabbur mein is ne’mat se mahroom ho gya, jo us ke hath mein thi.
Insaan ko ataa honay wali cheez us ke zarf ke mutabiq maani ikhtiyar karti hai. Woh khauf aur laalach ki kaifiyat mein tha, so us ki munaafaqat ne usay roti ko waisa hi dikhaaya jaisa woh dekhna chaahta tha. Aur is andhay-punn mein apni himaaqat ko hoshiyari samajh lena us ki khud-farebi ki intiha ban gyi, kyunke apni zaat ko fareb de kar bhi khud ko durust khyal karna bohat brri na-daani hai.
Apne ta’assub ki bina par baaz auqat hum apni be-bunyaad maloomat ko yak-tarfa tor par jma kartay hain, phir hum khud ko is par yaqeen dilaatay hain aur khud ko qaayel bhi kar laitay hain ke hum durust thay.
Jadeed nafsiyat ka usool hai; hmara idraak hmaari tawajjo ka ghulam hai. Jis taraf hmaari tawajjo hogi, hmain us par haqeeqat ka gumaan ho ga.
Jaisi, jis kay gumaan main aayi
Nietzsche kehta hai; hqaaiq kuch nahi hotay, bas un ki tashreehain hoti hain.
Baadshah ne is muammay ko navishta-e-taqdeer samjha, naan-baai ny apnay zaati t’assub kay ba-wujood isay mahz farmaan e shaahi ki taameel jaana aur darwaish ny isy apni zahaanat ka karishma qraar dia.
Ilm kya, Ilm ki haqiqat kya
Jaisi, jis kay gumaan main aayi
(Shaayer: Yaas Yagaana)
🌹 Sharing is Caring 🌹