Hum Bohat Khush Hai’n

Hum Bohat Khush hai’n
Itnay khush
Kay khushi kay izhaar kay taur par
Aik doosray kay qatl par aamada ho gaye hai’n

Is se kam tar
Koi aisa tareeqa siray se hai hi nahi
Kay hum apni khushi ka
Bharpoor izhaar kar sakai’n

Khushi kay izhaar kay farsudah treeqay
Hmaaray liye qabil-e-qubool nahi

Hum apni khushi mai’n
Har ek ko shareek karna chaahtay hai’n
Jo hmaari khushiyon mei’n shareek hai
Wohi hmaara asl dost hai
Laugo’n ko chahiye
Kay woh khushi khushi
Khud ko qatl kay liye paish karai’n
Bohat se khoon
Aur bohat si cheekho’n ka matlab aap samajhtay hain
Aik na-qaabil-e-bayaan khushi ka
Na-qaabil-e-bayaan izhaar
Khaah yeh izhaar dastarkhaan par kiya jaye
Ibaadat-gaah ki seerhiyo’n par
Ya adaalat kay drwaazay par

Aisay mei’n aik aansoo tau kya
Kisi tashweesh ko bhi
Aik bura shagoon samjhaa jaaye ga
Aisay mei’n kisi swaal ki gunjaaish bhi nahi
Hum se yeh bhi na poocha jaaye
Kay hum itnay khush kyu’n-kar hai’n

Hum bohat thakay huway hai’n
Raat bhar khoon bahaanay kay baad
Ab hum mei’n itni sakat bhi nahi
Kay hum apni ginti kar sakai’n
Ya yehi daikh sakai’n
Kay raat ki is maara maari mei’n
Hum nay us khushi kau tau halaak nahi kar diya
Jo hmaaray pehlu mei’n simti
Larz rahi thi.