ghair daryaaft shuda barr-e-aazam

​Daniel Goleman kay b’qol; ‘Agar aap apnay jazbaat se bai-khabar hain toh phir aap un kay rehm-o-karam par hain.’ Emotional Intelligence ki bunyaad khud-shanaasi par hai. Yeh ek aisa musalsal safar hai jo insaan ko baseerat se ham-kinar karta hai.

​Insan hamesha maujizaat ko apnay se baahar tlaaash karta hai, jab ke haqiqi maujiza us ki apni zaat ke andar posheeda salaahiyato’n ka adraak hai. Baaz auqaat koi shikast ya haadsa insaan ko apnay baatin se roo-b’roo kar deta hai aur woh apni haqiqi zaat ko pehchsan leta hai.

​Beshtar auqsat, humein kisi bairooni jadooyi locket ki khud-farebi se nikal kar apni hi zaat ka pathar khud se htaana parta hai. Apnay rastay mein haayel apnay wajood ko swaalo’n ki nauk-daar barchhiyo’n pe rakh kar tashkeek ki chhaini se pay-dar-pay waar kar ke apni hasti tak rasaai ke mraahil tay karnay partay hain.

Bartanvi musannif Redchester kehta hai; mayoos afrad usi lamhay zindagi ki mukhaalifat chhor dein gay, agar aap un ke sar par revolver taan dain. Ykaa-yak, unhain zinda rehnay ki laakho’n wajoohaat dikhaayi denay lagti hain. Woh laakho’n wajoohaat khud ko daryaaft karnay ke liye hamesha hmaaray andar pehlay se hi maujood hoti hain. Apne andar naye raasto’n ki khoj ke liye hmain bhi apnay sar par aisay hi revolver taan-na parr skta hai.

​Mash’hoor Amriki musannif ‘Alex Haley’ musalsal chaar bars tak b’tor musannif musalsal na-kaamiyon ka saamna karta raha aur bil-aakhir dil-bardaashta ho kar us ne apnay la-faani novel ‘Roots’ par mazeed kaam karna chhor kar apni zindagi ke khaatmay ka faisla bhi kar liya. Apnay is novel par woh musalsal nau bars se mehnat kar raha tha magar khud ko is kaam ke liye bhi na-ahal samajh kar us ne ek maal-bardaar jahaaz se khud ko Behr-ul-Kaahal mein gharq-aab karnay ki thaan li. Woh jahaz ki pusht par kharray huay hasrat se aakhri baar lehro’n ki jaanib dekh kar khud ko samundar-burd karnay hi waala tha keh usay apnay aaba-o-ajdaad ki awazain sunaayi dee’n;
Jo tum kar rahay thay usay mukammal karo kyun ke sabhi tum par umeed lagaaye baithay hain. Haar mat maano. Tum kar saktay ho. Hmain tum par poora bharosa hai.
Us waaqia ke chand hafto’n baad us ne apna novel ‘Roots’ mukammal kar liya, jo Amriki adab ka ek shaah-kaar saabit hua.

​Agar hmain apnay aaba-o-ajdaad ki awazain nahi sunaayi de rahi’n toh bhi apni zaat ki la-haasili ke jahaaz par kharray ho kar bai-maanviyat ke Behr-ul-Kaahal mein khud ko gharq-aab karnay ki bajaye,
Fake it, until you make it.
ko sach maan kar hmain khud hi apnay aaba-o-ajdaad ke kirdaar mein dhal kar tab tak khud ko sdaayain de kar aur phir unhi sdaao’n par labbaik keh kar dil-o-jaan se is mushkil tareen challenge ko qubool kar ke hi khud tak rasaai ki koi raah talash karni parr skti hai;