Duniya ka sab say zyaada Taaqat-war Shakhs

Amreeki Novel Nigaar James Michener ko Sadr Eisenhower ki jaanib se White House mei’n raat kay khaanay ka daawat-nama mila. Us ne is wazaahati tehreer kay saath aisi ghair mamooli daawat mei’n shirkat se maazrat kar li:
“Sadr-e-Muhtaram, aap kay daawat-namaay se teen roz qabl may apnay high school teacher kay aizaaz mei’n mun’aqqid honay wali taqreeb mei’n izhaar-e-khyaal karnay ka waada kar chuka hoo’n, jis ne mujhay likhna sikhaaya tha. Mujhay yaqeen hai, aap apni taqreeb mei’n meri ghair-maujoodgi mehsoos nahi karai’n gay magar us shaan-daar teacher ko meri ghair-haazri zaroor mehsoos hogi.”

Sadr Eisenhower ne nihaayat samajh-daari se jwaab diya:
“Aik shaks apni zindagi mei’n ‘umooman pandrah ya solah sadro’n ka daur dekh paata hai, magar aik misaali teacher zindagi me’in mushkil se aik-aadh baar hi mayassar aata hai.”


White House se daawat-nama yaqeenan bohat brra aizaaz khyaal kiya jaata hai, magar aisay sabhi aizaazo’n se barh kar aik ustaad kay rutbay ko amali taur par tasleem karna kahi’n zayada aham hai. Duniya kay taaqatwar ohday par braa’jmaan insaan ka daawat-naama ‘aarzi shohrat daita hai, magar aik ustaad kay ehsaan ka iqraar ab’di akhlaaqi fatah se hum-kinaar karta hai aur is baat ka dars bhi deta hai ke zindagi mei’n tarjeehaat ka durust ta’ayyun karna kitna zaroori hai.

Michener aur Eisenhower ne saabit kiya:
Azmat sirf brray brray mnassib se nahi aati balkay waaday ki paasdari aur shukr-guzari mei’n bhi posheeda hai.



Ek maahir-e-bashriyaat junubi Bahr-ul-Kaahil kay aik chhotay se jazeeray par tehqiqaat kay liye ‘aarzi qiyaam-pazeer tha. Aik roz us ka dil chaaha ke woh un kay sardaar se milay. Qabeelay ke tabeeb se us ki gehri dosti ho gayi thi. Us ne tabeeb se darkhaast ki ke woh usay apnay qabeelay keayaham tareen shaks se milwaaye.
Tabeeb usay jungle ke aik chhotay se khulay maidaan mei’n lay gya, jahaa’n aik buzurg aadmi kuch bacho’n ko parhaa raha tha.

“Kya yeh tumhaara baadshah hai?”
maahir-e-bashriyaat ne poocha.
“Nahi,” tabeeb bola, “Baadshah tau is jazeeray ka sab se taaqat-war shakhs hai. Aap ne tau kaha tha aap sab se aham shakhs se milna chaahtay hai’n. Is liye may aap ko hmaaray ustaad kay paas lay aaya hoo’n.”


Beshak, baadshah taaqat-war tareen tau ho sakta hai magar sab se aham hasti phir bhi ustaad ki hoti hai jo m’aashray ki tameer karta hai. Rooh-e-insaani ki san’at kay is imaarat-gar ka rutba duniya ki jis bhi tehzeeb ne tasleem kiya, woh ilm aur taraqqi ki raaho’n par gaamzan hui.

Asal ahmiyat usi ki hai jo shaoor baant’ta hai aur roshni phailaata hai.
Baadshah, sadr ya koi bhi hukmraan apni taaqat kay zor par sirf zameen par hukoomat karta hai, magar ustaad ki hukmraani hamesha logo’n kay dilo’n par hoti hai.