Bulandi aur pasti kay raastay

Ek baa-asar darbaari shakhs, Suqraat se mukhaاtib hua,
’’Tumhaari nisbat, mein zyaada asar-o-rusookh ka haamil hoon. Mein chahoon toh tumhaaray sabhi pero-kaaro’n ko tum se duur kar doo’n magar tum mujh se mera koi bhi pero-kaar nahi chheen saktay.‘‘

​Suqraat ne muskura kar jwaab diya,
’’Shaayad, tumhari baat theek hi ho kyun ke tum un sab ko pahaar ki bulandi se neechay laa rahay hotay ho jab ke mein unhein pahaar ki amoodi bulandi par waqay husn-e-akhlaq ke maabad par lay jaanay ki jiddo-jahd kar raha hota hoon, aur yeh ek aisa rasta hai jis par charhnay ki himmat koi jawaa’n-mard hi kar sakta hai.‘‘



​Suqraat ka rasta himmat, ist’qaamat aur akhlaaqi jurrat jaisay aala jazbaat ka taalib hai. Is dushwar-guzaar amoodi rastay par sirf wahi jawaa’n-mard charrh sakta hai, jo girnay se nahi balkay neechay reh jaanay se darta hai.

Suqraat kehta hai, akhlaaq ke m’aamlay mein kisi insaan ko ghair-sanjeeda honay ka haq haasil nahi. Us ki yehi sanjeedgi usay apni tareeki ko peh’chaan’nay aur khud-aagahi ki manzil tay karnay mein madad deti hai.

​Darbari shakhs taaqat, jabr aur aasaan rastay ki numaindgi karta hai. Yeh woh rasta hai jo mufaad-parasti aur jhooti anaa ki taraf le jaata hai.
Yeh rasta aasan hai aur hajoom ikattha kar leta hai jab ke sachaai ka rasta khuloos aur qurbaani maangta hai.


​’’Hum jitna buland urtay hain, un logo’n ko utnay hi chhotay dikhaai daitay hain jo urna nahi jaantay.‘‘ (Nietzsche)
​