Apni takmeel kar raha hoo’n may
Mohabbat aik bay-loas ehsaas aur anmol jazba hai. Is ki qeemat koi ada nahi kar sakta, phir bhi is haseen tareen ehsaas mei’n mubtla log khud is ki qeemat ban jate hai’n aur khud ko anmol kar daitay hai’n. Woh isay takhleeq dar takhleeq karnay mei’n magan rehtay hai’n aur agar kabhi aisa waqt aa jaaye keh apni hi takhleeq khareedni parray tau isay khareednay kay liye woh khud ko baich daitay hai’n. Woh is muqaddas daairay kay aseer ho kar isay wasee tar kartay huway zmaanay kay daairay ki qaid se maawra ho jaatay hai’n. Isi liye Oscar Wilde mohabbat kay bhaid ko maut kay bhaid se zyaada gehra qraar deta hai.
Faiz ke nazdeek, mohabbat darasal takmeel-e-zaat hai.
Apni takmeel kar raha hoo’n may
Warna tujh se tau mujh ko pyaar nahi
Aik larkay ne din raat ki mehnat se ek chhoti si kashti banaai aur fakhar se kehnay lagaa,
’’Tum saari ki saari meri ho. May ne tumhaara har hissa khud takhleeq kiya hai.’’
Woh ek jheel kinaaray pohcha. Usay isi din ka intezaar tha. Us kay haatho’n se bnee woh khoobsurat kashti jheel ke neelay shfaaf paani mei’n tairnay lagi. Achaanak, taiz hwaa aai aur kashti se bandhi woh dori toot gayi jis ka doosra sirah bachay kay haath mei’n tha.
Daikhtay hi daikhtay, kashti bachay ki risaai se bohot duur nikal gayi. Hatta keh jheel kay beech mei’n kahin ghaaib ho gayi. Woh dil-shikasta larka apni baad-baani kashti kay bina hi bojhal qadmo’n se ghar lauta.
Kai hafton baad, woh larka main-market mei’n ghoom rahaa tha. Jab woh khilono’n ki dukaan se guzra, tau uski nazar kisi khaas cheez par parri.
’’Aray, yeh rahi. Yeh kaisay mumkin hai?‘‘
Khirki mei’n usay apni kashti dikhaai di thi. Woh dukaan kay andar lapka aur dukaan kay maalik ko kashti ka saara qissa sunaaya. Us kay lehjay mei’n blaa ki udaasi thi,
’’Yeh sach mei’n meri hai. May ne apnay dono haatho’n se isay bnaaya tha.’’
Dukaan-daar sir hilaatay huway bola,
’’Sorry! Ab yeh kashti meri hai. Agar tum isay dobaara haasil karna chaahtay ho tau tumhai’n is ki qeemat adaa karni parray gi.’’
Agarchay larka afsurdah tha magar woh is azm kay saath dukaan se baahar nikla keh apni kashti waapas zaroor lay ga. Us ne phir se mehnat shuru ki. Apnay dosto’n, hamsaayo’n aur family ka har woh kaam karnay lagaa jis se usay kuch na kuch muaawza mil sakta tha.
Bil-aakhir, woh mubarak din aa gaya. Us kay andar khushi ka raqs jaari tha. Woh khilono’n ki dukaan kay andar daakhil hua aur apni mehnat ki jmaa-poonji counter par rakhtay huway bola,
’’May apni kashti kharidna chahta hoo’n.’’
Dukaan-daar ne brri ehtiyaat se maiz par bikhray kuch dollars aur raizgaari gini. Yeh raqm kaafi thi. Us ne pyar se window-showcase se woh kashti nikaali aur larkay kay phailay huway haatho’n par rakh di.
Seh-pehar ki khushgwaar dhoop mei’n fakhar se qadam uthaatay aur kashti kau baar baar apnay glay se lagaatay huway woh larka bola,
’’Tum meri ho. Aik baar phir meri. Pehlay may ne tumhai’n takhleeq kiya aur phir tumhai’n khareed liya.’’
🌹 Sharing is Caring 🌹