Apnay jazbaat apni jaib mai’n bhi rakkhai’n.

Logo’n kay liye madad-gaar haath baniye. Yehi woh neki hai jis ki har daur mei’n sab se zyaada zarurat rahi hai. Mumkin ho tau chupkay se kisi aik aisay zi-nafs ki zindagi ko aasaan bnaanay ki neki zaroor kijiye jiska gwaah faqat Parwardigar ho. Apna jaaiza laitay rahiye keh doosro’n ki bhaalai kay liye aap kay jazbaat durust m’qaam mei’n hon.


Aik dafa ek bhalay maanas ne sakht tangi-e-haalaat se dau-chaar ek bewa ki hasb-e-taufeeq maali madad ki, par woh raqam kaafi nahi thi. Woh mukhtalif jaan’nay waalo’n kay paas jaa kar us bewa ki madad ki isted’aa karnay laga magar us ki tag-o-dau taqreeban laa-haasil rahi.
Halaa’n-kay aksar afraad ne us maflook-ul-haal bewa ki abtari par gehray afsos ka izhaar kiya lekin us ki e’aanat kay liye koi amali qadam nahi uthaaya.
Woh shakhs ab bhi pur-umeed tha keh shaayad koi suurat nikal aaye. Apnay ek saahib-e-haisiat dost se mila. Us ne bhi koi madad tau na ki, bas dukh bharay lehjay mei’n kehnay laga,
“May is ghareeb bewa kay liye bohat zyaada afsurda hoo’n.”
Ye sun-kar madad maangnay waalay shakhs ne kahaa,
“May aap kay jazbaat ki qadr karta hoo’n lekin itna zaroor kahunga; ye jazbaat durust m’qaam mei’n nahi hai’n.”
Woh dolat-mand shakhs bola,
“Are bhai! Bilkul durust jagah mei’n hai’n; mairay ye jazbaat mairay dil ki gehraaiyo’n mei’n hai’n.”

Is baat par, woh dard-mand shakhs kehnay laga,
“Yehi tau masla hai; aap inhai’n ghalat jagah mehsoos kar rahay hain. Kaash yehi jazbaat aap ki jaib mei’n bhi hotay.”