Apnay dimaagh par qaabu rkhai’n

kisi taqreeb main koi muqarrir apni pur-asar taqreer se bohat zyada daad smait rha hai. Aap bhi doosron kay sath usay sraah rehay hain magar aap kay pooray jism main juhrjuhri si mehsoos ho rehi hay. Aap jaantay hain, aap us shakhs se behtar bol sktay hain. Aap ka lab-o-lehja us se zyaada pur-kashish hai.

Phir aap udhar kyun nehi?
sirf is liye keh aap kay dimagh main khauf hai. Woh khauf jo dimagh se baahir kaheen wujood nehi rakhta. Woh khauf jis se dimagh main muntashir khyalaat mzeed biphhar jaatay hain aur aap ka poora wujood khauf ki aamaaj-gaah bun jata hay.
kmi aap kay talent main nehi balkay dimagh main khyalaat yakja nah honay ki wajah se aap us shakhs ki tarah stage par maujood nehi. aagay brhnay kay liye qabliyat kaafi nehi, dimagh main muntashir khyalaat par qabu paanay ki mahaarat bhi zroori hai.
Aap qabil hain magar khauf nay us lamhay aap ki qaabliyat par qabu pa rkha hay.
Aap kau kiya krna hai?
Dimagh par qabu paana hai. Darr khud bhaag jaaye ga.


Teer andaazi kay keyi muqaablon main fatah haasil krnay kay baad, aik nojwaan champion nay Zen Master kau challenge kar diya jo kabhi apni teer andazi kay liye mash-hoor tha. us nojwaan nay apnay pehlay hee teer se bohat zyada faaslay par khrray aik duur-draaz hadaf ka nishana lagaa kar apni ghair mamooli tekneeki mahaarat ka muzahira kiya aur phir doosray teer se, pehlay teer kau nishana bnaa kar boorhay Zen Master se mukhatib huwa,
” Aap aisi mahaarat ka sboot paish kar sktay hain?

Apni kmaan khinchnay ki bjaaye Master nay brray itminan se nojwaan kau pahaari kay uuper apnay peeche aanay ka ishaara kiya. Tajassus kay aalam main, nojwaan Champion pahaari ki bulandi par Master kay peeche chlta rha htaa-keh woh aik shigaaf tak pahunch gye jis kay aٓar paar darakht kay ktay huway aik ghair hmwaar ptlay aur shikasta tnay ka pul sa bnaa huwa tha.
Boorha Master akela hee aaraam se us mutazalzal aur jaan laiva pul par qadam rkhtay huway drmiyaan tak aa gya. Kmaan main teer khaincha aur inthaayi faaslay par aik darakht ka nishana liya. Teer seedha nishaanay par lagaa.

Phir woh Ba-wqaar chaal se waapas murraa aur Mehfooz mqaam par khrray nojwaan se kahaa,
” Lo، ab tumhari baari hay.”

Us gehray aur haul-naak shigaaf kau khauf se ghoortay us nojwaan Champion main itni himmat nah rehi, keh woh us laraztay tnay par qadam rakh kar teer chlaa skay. Apnay mday-muqaabil Champion kay chehray par khauf kay aٓasaar dekh kar boorha Master bola,
”Yaqinan teer andaazi kay funn main tum yakta ho gye ho magar abhi tumhari mahaarat us dimagh kau qabu krnay main bohat km hai jo teer kau nishaanay tak pahuchaata hay۔’