Ae qahqahay bikhairnay waalay, tu khush bhi hai?
Aap ne yaqeenan yeh qissa suna hoga;
Ek udaas shakhs ne apnay psychologist se kaha, woh baihad ghamzadah aur zindagi se intehaai mayoos hai. Aksar khudkushi kay khayalaat usey ghere rakhte hain.
Psychologist ne usay mashwra diya, woh nazdeeki circus mei’n us mashhoor joker ki performance dekhnay jaaye, jisay daikh kar sabhi dukhi log apnay ghamo’n ko qahqaho’n mei’n urra daitay hai’n aur zindagi ki taraf laut aatay hai’n. Woh har waqt logo’n ko hansaata rehta hai.
Us shakhs ne mazeed udaasi bhray lehjay mei’n kaha, “Woh joker, may khud hoo’n.”
Logo’n ko hansaana ek intehai mushkil aur paicheeda art hai. Pas-e-mazaah apnay dukho’n ko chhupaana koi aasaan kaam nahi.
B’qol Anwar Masood, kisi qahqahay ko nichorai’n to is mei’n dau boond aansu nikaltay hai’n.
‘Aisay logon ki zaahiri muskurahat un kay andruuni haal ka mazahar nahi hoti.
Woh kisi theatre ka koi joker ho, ya hmaaray ird-gird har waqt doosro’n ko hansaanay wala koi zinda-dil shakhs; hmaara farz banta hai, us ki hansi mei’n apni hansi milaatay huay kabhi kabhaar yeh baat bhi us se pooch liya karai’n:
Ae qahqahay bikhairnay waalay, tu khush bhi hai?
Hansnay ki baat chhorr, ke hansta to may bhi hoo’n.
(Shaayer: Taimoor Hasan Taimoor)
Mumkin hai, woh apnay chehray par charhaaya hansi ka mask utaar kar kuch dair apni aankho’n kay andar aansuo’n mei’n gharqaab woh chehra bhi dikha skay, jo qahqahon aur taaliyo’n mei’n sab kay saamnay samundar-burd ho raha hota hai magar koi bhi is haqeeqat ka idraak nahi kar pa raha.
Santa Claus ka yaadgaar kirdaar ada karnay wala adaakar Edmund Gwenn jab qareeb-e-marg tha, us ka dost George Seaton us ki ayaadat kay liye aaya aur Gwenn kay bistar kay paas kursi rakh kar khaamoshi se baith gaya.
Kuch dair baad Gwenn ne aankhai’n kholee’n aur apnay puraanay dost ko pehchaan kar dheeray se bola:
“George, mujhay lagta hai, may marnay waala hoo’n.”
Seaton ne afsurdgi se kaha,
“Haan, mujhay maloom hai.”
Gwenn ne phir sargoshi ki,
“Mujhay yeh bilkul pasand nahi. Yeh ehsaas bohat draauna aur nafrat angaiz hai.”
“Haan, maitay dost. Marna waqai bohat mushkil kaam hai.”
Seaton ko tasalli ka koi munasib lafz hi nahi mil raha tha.
Gwenn ne lamha bhar kuch socha aur bola:
“Haan… lekin itna mushkil nahi, jitna ke comedy karna.”
Yeh Gwenn ke aakhri alfaaz thay.
Hansaana is liye bhi mushkil hai ke zra si be-ehteyaati se mazaah ek lamhay mei’n mazaaq mei’n dhal jaata hai aur is hassaas tawaazan ko qaaim rakhna hi hansaanay waalay kay liye asl challenge hai.
Maut ek aakhri aur hatmi haqeeqat hai jis mei’n hmai’n kuch nahi karna hota,
magar comedy zinda rehnay ka aisa amal hai jis mei’n hmai’n har lamha kuch naya takhleeq karna parrta hai.
Mashhoor joker Van Dyke ne ek comedy star Stan Laurel ke liye ek card bheja, jis par us ne apni pasandeeda nazm likh rakhi thi.
Stan Laurel ka inteqaal chohattar bars ki umr mei’n hua. Us ne apnay dosto’n ko sakhti se hidaayat ki thi:
“Agar meri tadfeen kay waqt kisi ne udaas chehray ke saath shirkat ki to may us se dobaara kabhi baat nahi karunga.”
Van Dyke ne wohi pasandeeda nazm Stan Laurel ki aakhri rasoomat mein parrhi taa-keh apnay zaati hero ko khiraj-e-aqeedat paish kar skay:
Khuda sab maskharo’n ko salaamat rakhay
Jo duniya kay stage par hansi kay saath jalwa-gar hotay hai’n
Jo apnay barjasta chutkilo’n se chhato’n tak goonj paida kartat hai’n
Jo kainaat ko khushi kay raqs se ghumaatay hai’n
Aur har din ko kisi na kisi soorat mazeed khoobsurat bnaatay hai’n
Khuda sab maskharo’n ko salaamat rakhay
Kaisi be-rang hoti yeh duniya
‘Agar un ka be-saakhta lams, un ki shokhi,
Buland qahqahay aur khushi ki dil-kash goonj na hoti
Inhi se to yeh zameen jaaye aman-o-sukoon banti hai
Khuda sab maskharo’n ko salaamat rakhay
inhai’n sehat mand lambi umr se nwaazay
‘inka rasta roshan kar day, yeh aik alag hi qabeeila hai’n
Yeh keemiya-gar hai’n, jo apnay dil kay karb ko badal daitay hai’n
Ek pur-kashish hansi mei’n, taa-keh har dil ko khushi se bhar sakai’n
Khuda sab maskharo’n ko salaamat rakhay
Hansaanay wqalay bhi kaisay ajeeb log hain, jo martay waqt bhi apni hiss-e-mazaah ko marnay nahi detay.
Maut kay karb ko dukh kay bjasye hansi kay saath qubool karna kisi joker ka hi kaam ho sakta hai.
Woh aisay hassaas log hai’n, jo martay waqt bhi apnay pyaaro’n kay dilo’n par gham ka bojh nahi daalna chqahtay.
Un kay nazdeek marna bhi ek art hai, jisay woh ghair-mamooli andaaz mei’n perform karnay ki khaahish rakhtay hai’n,
kyu’n ke har funn-kaar apni aakhri performance ko hamesha kay liye yaadgaar bnaana chaahta hai۔
🌹 Sharing is Caring 🌹