Aarzu kay badaltay chehray

Aik hawaai jahaaz ke pilot ne parwaaz ke dauraan neeche paharao’n ke daaman mein ek dilkash jheel ko dekha tau apne saathiyo’n se kahnay laga.

​”Tumhein pata hai, jab may naujawaan larka tha tau may aisi hi ek jheel se machhliya’n pakarta tha. Kashti mein baithay huay jab bhi may kisi urrtay huay jahaaz ko dekhta tay mairay dil mein khaahish paida hoti; kash may bhi jahaaz urraa raha hota, aur ab, may jab bhi kisi jheel ki jaanib dekhta hoon tau mera mann chaahta hai; kaash may machhliyaa’n pakar raha hota.”


​Hum aksar is ghalat fehmi ka shikaar hotay hain ke bairuni kamyaabi hi andaruni khushi ka waahid zariya hai hala’n ke khushi ka talluq insaan ka apnay kaam mein inhemaak aur uski maani-khezi mein hai.

​Insaan un cheezo’n ko zyaada pur-kashish samajhta hai jo uski rasaai se baahar hon. Duur ke dhol suhaanay lagtay hain jab tak ke woh dhol glay parr na jaaye’n.
Insaani fitrat mein bay-chaini hai. Sukoon sirf kisi paishay ka husool nahi balkeh us bai-chaini par qaabu paanay mein bhi hai.

​”Zindagi mein dau hi almiye hain; ek yeh ke, aap ko woh na milay jis ki aap ko tamanna hai aur dusra yeh ke, woh mil jae.” (Oscar Wilde)

​Tolkien ka khyaal hai, har woh shakhs jo bhatakta hai, gumshuda nahi hota.
​Yuu’n, machhairay se pilot aur phir dobaara machhairay ki taraf dil ka bhatakna gumshudagi nahi balkeh khud-shinaasi ka safar bhi ho sakta hai.