Aap ko bhi kisi saanehay ka intezaar hai?

Aik kachhua kisi keecharr aalood garrhay mei’n ja gira aur apni chhoti chhoti taango’n se waha’n se nikalnay ki bay-sood koshish karnay laga. Thori dair baad uska dost khargosh uski madad karnay aa pahucha lekin un dono ki bharpoor koshish kay bawajood kachhua us garrhay mei’n phansa raha.
Aakhir, kachhuay ne mayoos ho kar kaha,
“Koi faida nahi, mairay dost! Ab shaayad mera baahar nikalna namumkin hai.”
Doosre dost bhi udhar se guzray magar kachhuay ne kisi ki bhi madad lainay se inkaar kar diya, kyu’n keh ab usay yaqeen ho gaya tha keh uski maut usi garrhay mei’n likhi hai. Us nay apnay khol se aik baar sar baahar nikala aur aah bhari,
“Sab umeedai’n khatam ho gayee’n.”
Kuch dair baad, kachhuay ko shor sa sunaayi diya to usay mehsoos hua keh uski taraf barrhtay huway aik tractor ka tyre us garrhay kay upar se guzarnay wala hai. Usne bila sochay apni poori quwat laga kar chhalaang lagaai aur ba-hifaazat garrhay se baahar aa gaya. Jab us rastay se us kay dosto’n ka dobaara guzar hua to unho’n ne swaal kiya,
“Tum baahar kaisay aaye? Hum nay tau samjha tha keh ab tum kabhi baahar nahi nikal pao gay.”
Kachhue ne dheere se jwaab diya,
“Shayad may kabhi baahar na nikal paata, magar phir may ne dekha keh aik kisaan tractor liye mujhay kuchalnay waala hai aur tab to mujhay har haal mei’n baahar aana tha, so maay nikal aaya.”

Aap ko bhi aisay hi kisi saanhay ka intezaar hai?
Ya phir aap us naujwaan ki tarah kisi dhamki kay intezaar mei’n hai’n, jis se poocha gya:
“Yahan, tum kab se kaam kar rahe ho?”
To us nay jwaab diya,
“Jab se, unho’n ne mujhay kaam se nikalnay ki dhamki di hai.”

Is se pehlay keh zindagi aapko dhamki day, aap khud hi jang ka aaghaz kar dijiye.
Anthony Burgess ko chaalees bars ki umer mei’n brain tumor ka marz laahiq hua to woh “zindagi kay is garrhay” se nikalnay ki fikr mei’n lag gya, kyu’n kay doktro’n ne usay “dhamki” day di thi ke ek saal kay andar ab maut ka tractor usko rondnay waala hai. Woh bechaara ab is fikr mei’n tha ke us kay baad uski biwi m’aashi m’aamlaat kaisay sambhal paayegi. Us kay andar likhnay ki salaahiyat tau thi magar us nay kabhi isay b’tor paisha istemaal nahi kiya tha. Aur ab soorat-e-haal badal chuki thi.
Us nay deewana waar likhna shuru kar diya. Uski lagan ka yeh aalam tha ke ek saal kay andar us nay paanch novel likh daalay aur chhattay par kaam jaari tha, magar khush qismati se uska marz aahista aahista khatam hota gya aur us nay apni zindagi mei’n sattar se zyada kitaabai’n tahreer ki.
Agar cancer usay sazaye maut na sunata to woh kabhi bhi yeh kaarnama sar anjaam na day paata.

Dwaam chahiye to tasavvur kijiye, aapko bhi is garrhay se nikalna hai aur baqiya zindagi ki shuruaat abhi se ho chuki hai.

Kisi danishwar ne khabardar kiya tha,
“Apnay aaj par poora dhyaan dau kyu’n kay yeh lamha-e-maujood hi zindagi hai aur isi kay mukhtasir bahaavo mei’n aap kay wujood ka saara johar simta parraa hai.”