Aap kabhi boorhay na ho’n.

“Aap kabhi bhi boorhay na ho’n, chaahay kitni bhi tveel umr kyun na paa lai’n. Is hairat-angaiz duniya kay saamnay hmesha aik mutajssis bchay ki trah khray rhai’n, jis mai’n hum paida huay hai’n.
(Einstein)

Burrhaapa umar ka dhalna nahi balkay iraaday ka zwaal hai. Jo insaan jiddo-johd tark kar daita hai, woh zinda rehtay huay bhi andar se mar jaata hai. Jiddo-johd jism aur rooh dono ko jwaan rakhti hai. Isi liye, burrhaapa jismaani zwaal se kahin zyaada apnay maqsad se mehroomi ki haalat hai.


​Grandma Moses ne pandrah hzaar se zyaada aisi maqbool-e-aam paintings bnayee’n jin mein dehi zindagi ko mauzoo bnaaya gya tha. Sattar saal tak us ne kabhi koi painting nahi bnaayi aur us ka 25 feesad kaam sau saal ki umar ke baad ka hai.

​Jab woh nau-umar thi tau usay New York ke ek farm mein kaam karna prra. Grandma Moses ka asl naam Anna Mary Robertson tha. Us ki shaadi farm ke ek aur mulazim Tom Moses se ho gyi. Phir woh Cambridge Valley, Virginia apnay ek chhotay se farm mein muntaqil ho gaye aur rafta rafta das bacho’n ke walidain ban gaye. Jin mein se paanch ki wfaat bachpan mein hi ho gayi.

​Anna ko silaayi ka bahut shauq tha lekin jorro’n ke waram ke baa’is us ke haath aksar akrray rehtay thay. Athattar bars ki umar mein jab woh yeh kaam karnay ke bilkul qaabil na rahi to us ne painting bnaanay ki koshish karnay ka faisla kiya. Usay ehsas ho gaya, woh paint brush ko nisbatan sahoolat se pakar sakti hai. Us ne paintings bnaana shuru kar dee’n aur Cambridge Valley numaaish mein apni paintings paish kee’n. Wahaa’n us ki ek painting ko inaam tau mil gya lekin us ke baad koi zyadaa tazkira na hua.

​Ek roz New York City mein m’qeem ek art ka dildaada jab Cambridge Valley se guzar raha tha tau wahaa’n us ne ek medical store par us ki paintings daikhee’n. Yahi woh mubaarak lamha tha jab us ki tsaaveer ko aalam-geer shohrat hasil hui. Us ka har dil azeez kaam greeting cards aur New York City ke Museum of Modern Art mein numaaisho’n ki zeenat bna.

Rafta rafta woh America ki mashhoor tareen folk artist ban gayi.

​Woh sau baras ki umar tak brri mehnat se paintings takhleeq karti rahi. Tangdasti, beemari aur zaati sadmaat ke bawajood us ne himmat nahi haari. Us ki zindagi ki kahaani is baat ki taaqatwar misaal hai ke kamyaabi aur takhleeqi izhaar ke liye umar koi rukaawat nahi.
​Woh kehti hai:
“Agar mein ne painting shuru na ki hotee’n, tau bhi mein (khaali baithnay ki bjaaye) murghiya’an paal rahi hoti.”

Us ke nazdeek aham yeh nahi tha, woh kya kar rahi hai, balkay aham yeh tha ke woh kuch na kuch kar rahi hai.

​Woh maut tak mutaharrak rahi aur har umar ke afraad ke dilo’n par umeed ka paigham ban kar chha gayi.


“Aap kabhi itnay boorhay nehi hotay k koi nya maqsad na tay kar skai’n, ya koi nya khaab na daikh skai’n.
(C. S. Lewis)