Aansu bhi buhaaduri ki zubaan hai’n.

“Treasure Island” ka musannif, Robert Louis Stevenson, Scotland ka numaa’inda Novel-Nigaar tha. Apni bimaari kay baais arsa draaz tak bistar par parray rehnay kay bawajood us ne apna daaman umeed se hi waabasta rakha. Woh hamesha har m’aamlay ka roshan pehlu dekha karta tha. Us ki biwi us kay mustaqil umeed-parast rawaiyye par hamesha muta‘ajjib rehti thi.
Aik ror marz aisa zor-aawar hua keh musalsal khaans khaans kar us ka bura haal ho gya. Maghmoom biwi ghar mei’n, jis tarah mumkin tha, us ki daikh-bhaal mei’n lagi hui thi. Maahol ki sakhti kam karnay ki khaatir us ne muskura kar apnay shohar se swaal kiya,
“Robert, mujhay lagta hai; tumhai’n ab bhi yaqeen hai ke aaj ka din brraa zabardast hai.”
Stevenson bhi usay daikh kar muskuaaya aur apnay bistar kay saath kamray ki diwaar par khirki kay raastay se andar aanay waali sooraj ki kirano’n ki taraf ishaara kartay huway bola,
“Haan, maira yaqeen hai, aaj ka din bohat zabardast hai; may dwaao’n se bhari bottlo’n ki is qtaar ko is baat ki ijaazat kabhi nahi doo’n ga, woh meri umeed kay ufaq ki dhoop mujh tak aanay se rok paayai’n.”

Stevenson jaisay zinda-dil kirdaar hmaaray aas paas maujood hai’n. Aisay khud-daar logo’n se zindagi seekhiye.
Magar is bareek nuktay ko kabhi fraamosh na kijiye; rona koi buri baat nahi. Logo’n ko ronay kay liye kandhaa zaroor dijiye.

Baaz-auqat aisay khud-daar log bhi ronay ki tamannaa rakhtay hai’n, par hum un se yehi umeed kartay hai’n keh woh aisay baa-hosla insaan hai’n jo rona tau duur ki baat, is ka tasavvur bhi nahi kar saktay.
Yuu’n, hum un logo’n ke ronay ki sahulat bhi un se chheen laitay hai’n.

Hum aansoo bahaanay waalay ko kamzor aur buzdil qraar day kar bohat brra zulm kartay hai’n.
Jab chot lagay; aansoo behna fitri baat hai, buzdili nahi.

Adrienne Rich ne kaha tha,
“(Hmaaray darmiyaan) aisi hastiyaa’n zaroor honi chahiyei’n, jin kay paas baith kar hum aansoo bahayaai’n aur phir bhi hmara shumaar jang-ju sipahiyon mei’n ho.”

Aik Maa kay qareeb khailta hua dau-teen bars ka bachcha achaanak chot khaanay par bhaagta hua apni Maa ke paas hi aata hai aur Maa usay glay lgaa kar pyaar kartay huway musalsal usay apnay ‘bahadur bachay‘ kay laqab se pukaarti hai.
Bachcha seena taan kar waapas khail mei’n lag jaata hai.

Sochiye, woh har baar chot kha kar Maa ki taraf hi faryaad lay kar aata hai, lekin phir bhi woh ‘bahadur beta’ hi rehta hai.