kainaat ka qeemti treen pathar

Apni zarurat se zyaada ashyaa ko doosro’n mai’n baant dena kaisa dilkash amal hai. Magar jo insaan apni zarurat ki cheez bhi doosro’n kay maangnay par baghair hich-kichaaye unhai’n ataa kar day, woh ehsaas ki baidaari kay buland tareen martabay par faiz hota hai, jo is baat ka zinda saboot hota hai kay qudrat insaan se abhi tak mayoos nahi hui.

Aisay laugo’n kay husn-e-amal se hi kainaat ka husn baqi hai, aur jahaa’n bhi aisay laugo’n ka bsaira hota hai, zameen ka woh tukra jannat ka manzar pesh karta hai.

Aise log qanaa’at ki daulat se itnay maala-maal hotay hai’n ke baqi sab kuch unhein haqeer mehsoos hota hai.


Pahaaro’n mai’n safar karnay waali aik ba-sha’oor khatoon ko ndee mai’n se aik nihaayat qeemati pathar mila. Aglay roz uski mulaaqat aik aur musaafir se hui jo bohat zyaada bhooka tha.
Khatoon ne apna bag khol kar us ajnabi ko khaanay kay liye kuch diya. Bhookay musaafir ne khatoon kay bag mai’n rakha woh qeemati pathar dekh liya, uski tareef ki, aur khatoon se iltija ki keh woh pathar usay day day. Khatoon ne bila-ta’amul uski khaahish puri kar di.
Musafir jab wahan se rawana hua to apni khush qismati par nihaayat khush tha.
Usay maaloom tha keh woh pathar itna zyaada qeemati hai keh ab woh zindagi bhar ki fikr-e-ma’aash se azaad ho gyaa hai.
Lekin kuch roz baad woh waapas aaya aur us khatoon ko talaash karnay laga.

Jab woh khatoon usay mili, us nay pathar waapas kiya aur kehnay lgaa:

“May bus isi soch kay zair-e-asar raha, Mujhe is pathar ki qadr-o-qeemat ka ba’khubi ilm hai, magar may is umeed par aap ko yeh waapas kar raha hoo’n keh aap kay paas mujhay daubay kay liye is se bhi barh kar koi qeemati cheez zaroor hai.
Agar aapke liye mumkin hai tau mujhay apni woh qeemati tareen cheez ataa kijiye jis ne aap ko is qabil banaya keh aap ne yeh pathar mujhe day diya.”