Aik naimat bhi yehi aik qyaamat bhi yehi
Aag’hee bohat brri naimat hai. Yeh neyi raaho’n, aur neyi manzilo’n ki taraf insaan ki rehnumaayi krti hai. Us kay andar tehqeeqi aur tanqeedi soch baidaar krti hai aur woh apnay gird cheezo’n kau zyaada gehraai se jaan’nay lagta hai. Woh ghor o fikr kar kay apni zaat ki keyi hqiqto’n se aashna ho jata hai. Kainaat kay raaz us par khulnay lgtay hai’n. Naye naye maani us par aashkar hotay hain.
Aag’hee qyaamat bhi hai. Sachaai par saabit qadam rehnay kay liye mustaqil jidd-o-jahd drkaar hoti hai. Pani kay bahaao ki samt behna aasan hai magar ruhaani baidaari kay sath zindagi guzaarnay kay liye maujo’n ki rwaani kay mukhaalif tairna prrta hay. Insan tanha ho jata hai. doosray us kau paagal samajhtay hain aur us ki zindagi ajeeran ho jati hai.
Yahaa’n se asl imtihaan shuru hota hai. Insaan kau munfrid, takhliqi aur haqeeqat par mabni andaz-e-fikr par qaaim rehnay kay liye logo’n kay musalsal tanz kay nishtar sehnay parrtay hain. Agar woh yeh bhaari qeemat adaa kar day, tau tareekh mai’n aik lazwaal kirdaar bun kay zinda rehta hai.
Agar woh yeh qeemat nah day paaye tau us kay andar smaaj ki ghsii pitti soch se hum-aahangi ki khaahish janam lainay lgti hay. Woh us azaab se bchnay kay liye siraat-e-mustaqeem par chalnay ki bjaaye andhi taqleed par samjhota kar leta hay. Taa keh us ki zindagi main aasoodgi rehay. Aur yuun woh bhairr-chaal mai’n shaamil ho kar baqi logo’n ki tarah maut aanay par mar jata hai.
aik naimat bhi yehi aik qyaamat bhi yehi
rooh ka jaagna aur aankh ka beenaa hona
(Ahmad Nadeem Qasmi)
Hikaayat hai;
Hazrat Khizr nay logo’n kau tanbeeh ki; aik muqarrirah din par duniya se saara paani ghaaib ho jaaye ga. siwaaye us kay jo khud se zakheera kiya gya ho. Us kay baad naya paani zaahir ho ga lekin us paani ka istemaal logo’n ko paagal bnaa day ga.
Aik aadmi un ki naseehat kau samajh gya. Us nay bohat sa paani aik mehfooz jagah par Jmaa kar liya. Ab usay intezaar tha, paani ki asl soorat kab bdlay gi?
Muqarrirah din aaya. Nehrai’n aur kunwai’n khushk ho gye. Woh aadmi apnay zkheeray se paani peeta rha. Phir jab usay maloom huwa keh naya paani zameen par zaahir ho gya hai, woh apni pnaah-gaah se nikal kar doosray insaano kay drmiyaan aa gya.
Logo’n kay sochnay aur baat karnay ka andaaz bilkul badal gya tha۔ kisi kau yaad nehi tha, un kay saath kya huwa hai. Jab us aadmi nay un se baat krnay ki koshish ki, logo’n nay usay paagal khyaal kiya. kabhi nafrat aur kabhi ham-dardi se usay daikhtay rehay magar woh us aadmi kau samajh nah paaye.
Woh aadmi apnay zkheeray se paani peeta rha.
Aakhir-kaar, woh tanhaayi aur munfrid soch ki aziyyat bardaasht nah kar paaya. Us nay tang aa kar naya paani pi liya. Ab woh doosro’n ki tarah ho gya. Phir woh apnay zkheeray kau bhi bhool gya.
Logo’n nay usay daikha aur kehnay lgay.
Yeh wohi paagal hai jo kisi maujzay se dobaarah theek ho gya hai.
🌹 Sharing is Caring 🌹