“ہم وہی ہیں, “جو ‘انتخاب’ کیا

ایک بادشاہ نے فیصلہ کیا کہ وہ اپنی دولت کا کچھ حصہ کسی دنیوی غرض کے بغیر خالصتاً خدا کی راہ میں خیرات کرے گا۔ ساتھ ہی وہ یہ بھی دیکھنا چاہتا تھا کہ اس خیرات کا انجام کیا ہوتا ہے۔ چنانچہ اس نے ایک قابلِ اعتماد نانبائی کو بلایا اور اسے دو روٹیاں تیار کرنے کا حکم دیا۔ ایک روٹی کے اندر کچھ بیش قیمت جواہرات گوندھ دیئے گئے، جبکہ دوسری روٹی صرف آٹے اور پانی سے تیار کی گئی۔

یہ دونوں روٹیاں ان دو افراد کو دی جانی تھیں جو نانبائی کی نظر میں سب سے زیادہ اور سب سے کم متقی ہوں۔
اگلی صبح دو آدمی تنور پر حاضر ہوئے۔ ایک نے درویشانہ لباس پہن رکھا تھا اور نہایت پارسا معلوم ہوتا تھا، حالانکہ حقیقت میں وہ محض ریاکار تھا۔ دوسرا شخص، خاموش طبع تھا۔ اتفاق سے چہرے کی مشابہت کی وجہ سے وہ نانبائی کو اس کے کسی ناپسندیدہ شخص کی یاد دلا رہا تھا۔

جیسے ہی اس منافق درویش کو روٹی ملی، وہ اسے ہاتھ میں تولنے اور ٹٹولنے لگا۔ اسے محسوس ہوا، روٹی میں آٹے کی گٹھلیاں رہ گئی ہیں۔ جب اس نے وزن کیا تو جواہرات کی وجہ سے اسے روٹی ضرورت سے زیادہ بھاری لگی۔ اس نے نانبائی کی طرف دیکھا اور بھانپ گیا، یہ کوئی معمولی آدمی نہیں ہے جس سے بے تکلفی کی جا سکے۔ چنانچہ وہ دوسرے شخص کی طرف مڑا اور بولا؛
’’کیوں نہ تم اپنی روٹی میری روٹی سے بدل لو؟ تم بھوکے معلوم ہوتے ہو اور یہ روٹی سائز میں بڑی ہے۔‘‘
دوسراشخص، جو تقدیر کا ہر فیصلہ قبول کرنے پر آمادہ تھا، خوشی خوشی روٹی بدلنے پر تیار ہو گیا۔‘‘

بادشاہ جو دروازے کی درز سے یہ منظر دیکھ رہا تھا، حیران تو ہوا مگر دونوں افرد کی باطنی کیفیت نہ سمجھ پایا۔

یوں منافق درویش کے حصے میں سادہ روٹی آئی۔

بادشاہ نے یہ نتیجہ اخذ کر لیا; تقدیر نے درویش کو دولت کے فتنے سے دور رکھنے کے لیے مداخلت کی۔ دوسری طرف، حقیقتاً نیک انسان کو جواہرات مل گئے اور وہ ان کا بہترین استعمال کرنے کے قابل ہو گیا۔

بادشاہ اس واقعے کی گتھی نہ سلجھا سکا۔

نانبائی نے عرض کی؛
’’میں نے وہ کیا جو مجھے حکم ہوا تھا۔‘‘

بادشاہ بولا؛
’’تقدیر کے کام میں دست اندازی نہیں کی جا سکتی ۔‘‘

اور منافق درویش نے دل میں کہا؛
’’ واہ! میں کتنا چالاک تھا۔ (ادریس شاہ)