​’سبزۂ باغ‘ و ’سبزۂ خط‘ و ’سبزۂ زنگار‘ و ’سبزۂ جوہر‘ کو طوطی سے تشبیہ دیتے ہیں اور آئینہ فولاد کے جوہروں کی سبزی ہر ایک رُخ سے قائم نہیں ہوتی، اس سبب سے اسے طوطیِ بسمل سے تشبیہ دی کہ اس میں حرکت معلوم ہوتی ہے اور متحرک کی متحرک سے تشبیہ جس میں وجہِ شبہ بھی حرکت ہو نہایت لطیف و بدیع ہوتی ہے، غرض یہ ہے کہ اُس کے آئینہ فولاد میں جوہروں کی سبزی جو بعض رُخ سے دکھائی دے جاتی ہے یہ طوطی بسمل ہے جسے شوخیِ ناز سے بسمل کر دیا ہے، اسی طرح کی تشبیہ بے تابیِ ذرہ و بے قراریِ دل سے پہلے شعر میں بھی ہے اور نعمت کا مصرع چمن بے تاب، چوں طاؤس، بسمل اسی قسم کی تشبیہ رکھتا ہے۔