تَو جناب، ذرا بتائیے تو سہی، آپ کون ہیں؟

تو، آئیے، رو لیجیے، اگر اُفق کے اُس پار ستارا تو ہم نے دیکھ لیا مگر خُود کو نہیں دیکھ پائے۔ اپنوں کی دُوری کا غم ناقابلِ برداشت ہوا تو اُن کو منا لیا مگر اپنے آپ سے دُوری کا غم منانا بھُول گئے۔ اپنے دِل میں پُوری کائنات سمو لی پَر خُود کے لیے جگہ نہ بنا پائے۔ چلیں، ایک آنسو نہ سہی، ایک قہقہہ تو بنتا ہے نا، خُود سے دُوری پر۔ وہ قہقہہ، جو فلک شگاف چاہے نہ ہو لیکن اپنی ذات میں شگاف ڈال کر خُود کو واشگاف کردے تو بھی کافی ہے۔ دُوسروں سے مات کھانا، واقعی میں، بہت بڑا دُکھ ہے مگر خُود سے مات کھا کر خُود سے بھاگتے رہنا بھی تو ایک دائمی شِکست ہے۔
تو پھِر، اپنے قریب آئیے، خًُود کو چھُونے کی کوشش کیجیے اور زمانے بھر کو اپنے سحر میں لے لیجیے۔
شرم کِس بات کی؟ دستک دیجیے۔
جھجک کاہے کی؟ دروازہ کھولیے اور خُود کا اِستقبال کیجیے۔ اور تفکر کی ابتدا کیجیے۔

بلیز پاسکل کے خیال میں، ‘انسان کی ساری مشکلات دراصل اُس کی اپنی ہی نااہلی کی بنا پر سر اٹھاتی رہتی ہیں کہ وہ کبھی کسی کمرے میں تھوڑی دیر کے لیے بھی بالکل تنہا خاموشی سے اپنے ساتھ وقت نہیں گزارتا۔
بقول افلاطون، ‘غوروفکر کا عمل اپنی ذات سے ہمکلامی کا شرف ہے۔ اپنی ہی کائنات میں اپنے روبرو ہو کر ایک طویل مکالمے کا آغاز کیجئے۔
فرانز کافکا کہتا ہے، ” آپ کو اپنے کمرے سے باہر جانے کی کوئی ضرورت نہیں۔ اپنی میز کے قریب بیٹھے رہیے اور سننے کی کوشش کریں چاہے سنیے بھی نہیں، بس انتظار کیجیے۔ انتظار بھی نہ کیجیے۔ خاموش اکیلے بیٹھے رہیے۔ دنیا اپنا ہر پردہ ہٹا کر خوشی سے خود کو آپ کے حضور پیش کر دے گی۔ اس کے پاس کوئی دوسرا راستہ نہیں، یہ دیوانہ وار آپ کے قدموں تلے ڈھے پڑے گی……‘‘

ڈاکٹر ڈیوِڈ شوارٹز کی تحقیق کے مطابق، ہسپتالوں میں اسّی فی صد بِستر ایسے مریضوں سے بھرے پڑے ہیں،جنھوں نے اپنے مَرض کو اپنے دماغ پرسوارکر رکھا ہے۔ اس کا یہ مطلب ہر گِز نہیں کہ وہ لوگ جِسمانی مَرض میں مبتلا نہیں ہیں، بلکہ یہ ہے کہ اُن کے مَرض کی اِبتدا ،جِسم کی بجائے، اُن کے دماغ میں ہوئی تھی۔
اِس لیے، دماغ سے اِس ’وہم‘ کو نکالیے کہ آپ ’وہم‘ ہیں۔
دُنیا کو قدموں میں ڈھیر کرنے سے پہلے، خُود کو اپنے قدموں سے اُٹھائیے۔ خُود سے شکست کھا کے خًُود کو فتح کیجیے۔
مزید تاخیر مت کیجیے،کیوں کہ؛
’’ آج، آپ کی بقیہ زِندگی کا پہلا دِن ہے۔‘‘
لہٰذا: