اے قہقہے بکھیرنے والے تو خوش بھی ہے؟

ممکن ہے، وہ اپنے چہرے پر چڑھایا ہنسی کا ماسک اتار کر کچھ دیر اپنی آنکھوں کے اندر آنسووں میں غرقاب وہ چہرہ بھی دکھا سکے، جو قہقہوں اور تالیوں میں سب کے سامنے سمندر برد ہو رہا ہے مگر کوئی بھی اس حقیقت کا ادراک نہیں کر پا رہا۔



سانتا کلاز کا یادگار کردار ادا کرنے والا اداکار ایڈمنڈ گوین جب قریب مرگ تھا، اس کا دوست جارج سیتون اس کی عیادت کے لیے آیا اور گوین کے بستر کے پاس کرسی رکھ کر خاموشی سے بیٹھ گیا۔
کچھ دیر بعد گوین نے آنکھیں کھولیں اور اپنے پرانے دوست کو پہچان کر دھیرے سے بولا،
’ جارج، مجھے لگتا ہے، میں مرنے والا ہوں۔‘

سیتون نے افسردگی سے کہا،
’ ہاں، مجھے معلوم ہے۔‘

گوین نے پھر سرگوشی کی،
’ مجھے یہ بالکل پسند نہیں۔ یہ احساس بہت ڈراونا اور نفرت انگیز ہے۔‘

’ ہاں ، میرے دوست۔ مرنا واقعی بہت مشکل کام ہے۔‘
سیتون کو تسلی کا کوئی مناسب لفظ ہی نہیں مل رہا تھا۔

گوین نے لمحہ بھر کچھ سوچا اور بولا،
’ ہاں، لیکن اتنا مشکل نہیں، جتنا کہ کامیڈی کرنا‘۔

یہ گوین کے آخری الفاظ تھے۔



ہنسانا اس لیے بھی مشکل ہے، کہ ذرا سی بے احتیاطی سے مزاح ایک لمحے میں مذاق میں ڈھل جاتا ہے اور اس حساس توازن کو قائم رکھنا ہی ہنسانے والے کے لیے اصل چیلنج ہے۔ موت ایک آخری اور حتمی حقیقت ہے جس میں ہمیں کچھ نہیں کرنا ہوتا مگر کامیڈی زندہ رہنے کا ایساعمل ہے جس میں ہمیں ہر لمحہ کچھ نیا تخلیق کرنا پڑتا ہے۔



مشہور جوکر وین ڈائیک نے ایک کامیڈی سٹار اسٹین لارل کے لیے ایک کارڈ بھیجا، جس پر اس نے اپنی پسندیدہ نظم لکھ رکھی تھی۔
اسٹین لارل کا انتقال چوہتر برس کی عمر میں ہوا۔ اس نے اپنے دوستوں کو سختی سے ہدایت کی تھی؛

’ اگر میری تدفین کے وقت کسی نے اداس چہرے کے ساتھ شرکت کی تو میں اس سے دوبارہ کبھی بات نہیں کروں گا۔‘

وین ڈائیک نے اپنی وہی پسندیدہ نظم، اسٹین لارل کی آخری رسومات میں پڑھی تا کہ اپنے ذاتی ہیرو کو خراج عقیدت پیش کر سکے۔