ایک نعمت بھی یہی ایک قیامت بھی یہی

آگہی بہت بڑی نعمت ہے۔ یہ نئی راہوں، اور نئی منزلوں کی طرف انسان کی رہنمائی کرتی ہے۔ اس کے اندر تحقیقی اور تنقیدی سوچ بیدار کرتی ہے اور وہ اپنے گرد چیزوں کو زیادہ گہرائی سے جاننے لگتا ہے۔ وہ غور و فکر کر کے اپنی ذات کی کئی حقیقتوں سے آشنا ہو جاتا ہے۔ کائنات کے راز اس پر کھُلنے لگتے ہیں۔ نئے نئے معانی اس پر آشکار ہوتے ہیں۔

آگہی قیامت بھی ہے۔ سچائی پر ثابت قدم رہنے کے لیے مستقل جدوجہد درکار ہوتی ہے۔ پانی کے بہاو کی سمت بہنا آسان ہے مگر روحانی بیداری کے ساتھ زندگی گزارنے کے لیے موجوں کی روانی کے مخالف تیرنا پڑتا ہے۔ انسان تنہا ہو جاتا ہے۔ دوسرے اس کو پاگل سمجھتے ہیں اور اس کی زندگی اجیرن ہو جاتی ہے۔

یہاں سے اصل امتحان شروع ہوتا ہے۔ انسان کو منفرد، تخلیقی اور حقیقت پر مبنی اندازِ فکر پر قائم رہنے کے لیے لوگوں کے مسلسل طنز کے نشتر سہنے پڑتے ہیں۔ اگر وہ یہ بھاری قیمت ادا کر دے، تو تاریخ میں ایک لازوال کردار بن کے زندہ رہتا ہے۔
اگر وہ یہ قیمت نہ دے پائے تو اس کے اندر سماج کی گھسی پٹی سوچ سے ہم آہنگی کی خواہش جنم لینے لگتی ہے۔ وہ اس عذاب سے بچنے کے لیے صراط مستقیم پر چلنے کی بجائے اندھی تقلید پر سمجھوتہ کر لیتا ہے۔ تا کہ اس کی زندگی میں آسودگی رہے۔ اور یوں وہ بھیڑ چال میں شامل ہو کر باقی لوگوں کی طرح موت آنے پر مر جاتا ہے۔